Parandalohet sherri mes 23 të miturve në Tiranë

Një konflikt mes një grupi të miturish është parandaluar nga Policia e Tiranës në zonën e Yzberishtit, përpara se situata të përshkallëzohej. Në përfundim të veprimeve të kryera nga efektivët, 23 të mitur, të moshave 13 deri në 17 vjeç, janë proceduar në gjendje të lirë.

Ngjarja u parandalua në rrugën “Besim Alla”, ku shërbimet e Komisariatit të Policisë Nr. 6 ndërhynë pas marrjes së informacionit se një grup të rinjsh do të përfshihej në një përplasje.

Efektivët mbërritën në zonën e sinjalizuar dhe konstatuan disa prej të miturve me shkopinj bejsbolli, të cilët dyshohet se do të përdoreshin gjatë konfliktit. Dy shkopinj bejsbolli u sekuestruan nga policia.

Të miturit që u gjetën me sendet e forta u shoqëruan në komisariat. Në vijim të veprimeve, efektivët identifikuan edhe personat e tjerë që dyshohet se do të merrnin pjesë në përplasjen e planifikuar.

Pas përfundimit të procedurave, materialet për rastin iu referuan Prokurorisë dhe ndaj 23 të miturve nisi procedimi penal në gjendje të lirë. Veprimet janë kryer në praninë e prindërve dhe psikologut, në përputhje me procedurat që zbatohen për të miturit.

Policia e Tiranës ka bërë apel për bashkëpunim nga prindërit, familjarët dhe stafi arsimor, veçanërisht në rastet kur vërehen shenja që mund të paralajmërojnë konflikte mes të rinjve, përfshirë edhe aktivitetet e tyre në rrjetet sociale.

Sipas policisë, ndërhyrja në kohë synon të parandalojë përshkallëzimin e konflikteve mes të miturve, të cilat mund të nisin për arsye të parëndësishme dhe të përfundojnë me pasoja më të rënda.