Pedagogu kërkon publikisht mbështetjen e Berishës për Tiranën

Ermal Hasimja ka shpallur zyrtarisht kandidaturën e tij për postin e kryetarit të Bashkisë së Tiranës.

Në një deklaratë publike, Hasimja iu drejtua drejtpërdrejt liderit të Partisë Demokratike, Sali Berisha, duke e njoftuar se është i gatshëm të kandidojë në përputhje me kriteret që ky i fundit përcaktoi të shtunën.

Ai theksoi se synon të ketë mbështetjen e Berishës dhe të forcave të tjera opozitare, duke e paraqitur veten si një kandidat të pavarur dhe përbashkues për të gjithë spektrin opozitar.

“Me duket pozicioni logjik është që një opozitë e bashkuar të dalë me një kandidat të pavarur, i cili do të mbështetet nga një shumicë sa më e madhe e partive opozitare. Berisha ka kërkuar që edhe kandidatët e tjerë të shprehin dëshirat dhe ambiciet e tyre. Duke pasur këtë mundësi, unë po i drejtohem zotit Berisha dhe kryesisë së PD-së, si dhe forcave të tjera opozitare, duke ju paraqitur publikisht kandidaturën time për kreun e Bashkisë së Tiranës, me të njëjtat kritere që ai ka përcaktuar: kandidat i pavarur, pa logo specifike partie, i mbështetur nga shumica e opozitës. Prandaj, zoti Berisha mund ta quajë kandidaturën time të paraqitur dhe ta shqyrtojë,” tha Hasimja për Euronews Albania.