Përfshihet nga flakët Dritare TV, zbardhen detajet e ngjarjes

Një zjarr në një kompleks në Tiranë, ku ndodhen edhe ambientet e televizionit online Dritare TV, ka shkaktuar dëme të konsiderueshme materiale, duke prekur veçanërisht regj atë e transmetimit. Ngjarja ka ndërprerë përkohësisht aktivitetin e televizionit, ndërsa dëmtimet janë shoqëruar edhe me depërtimin e ujit në ambientet e prekura.

Gazetarja dhe drejtuesja e Dritare TV, Rudina Xhunga, ka ndarë detaje nga momentet e vështira, duke shpjeguar se zjarri dyshohet të ketë nisur nga tubat e aspirimit të një restoranti brenda kompleksit, përpara se flakët të përhapeshin drejt ambienteve të televizionit.

Sipas rrëfimit të saj, ngjarja ndodhi pak pasi kishin përfunduar xhirimet e dy emisioneve. Situata u përshkallëzua shpejt, duke e kthyer sigurinë e njerëzve në përparësinë kryesore.

“Po digjeshim”, është shprehja me të cilën Xhunga ka përshkruar atë moment, duke kujtuar përpjekjet për të nxjerrë njerëzit në një vend të sigurt, për të ndërprerë energjinë elektrike dhe për të pritur ndërhyrjen e zjarrfikësve.

Ajo ka falënderuar ekipet zjarrfikëse për reagimin e shpejtë, që ndërhyri për të përballuar situatën.

Dëmet nga zjarri dhe uji, televizionit i duhet kohë për t’u rikthyer në normalitet

Pasojat nuk janë kufizuar vetëm te dëmtimet e shkaktuara nga flakët. Shkrirja e tubave të shkarkimit të ujërave dhe të shiut ka sjellë edhe përmbytjen e disa ambienteve, duke rënduar më tej situatën. Sipas Xhungës, uji vijon të depërtojë në hapësirat e dëmtuara.

Dëmet në regjinë e transmetimit dhe në ambientet e tjera pritet të ndikojnë në vijimësinë e punës së televizionit, i cili ka paralajmëruar një periudhë me aktivitet të reduktuar.

Ndërkohë, për ngjarjen janë bërë kallëzime në Polici dhe Prokurori. Shkaku i zjarrit mbetet në nivel dyshimi, ndërsa rrethanat e plota duhet të sqarohen nga institucionet përgjegjëse.

Përballë kësaj situate, Rudina Xhunga u ka kërkuar ndjekësve mirëkuptim për ndryshimet e përkohshme në programacion dhe në aktivitetin e televizionit, duke shprehur vendosmërinë për të vijuar punën pavarësisht dëmeve.

“Na falni për këtë periudhë me pak aktivitet! Por do të vijojmë të jemi bashkë”, shkruan Xhunga.