Përmbytet burgu i Erion Veliajt dhe Ilir Beqajt

Situata në Durrës vijon të mbetet e rënduar për shkak të reshjeve të dendura të shiut, të cilat kanë sjellë përmbytje në disa zona të qytetit dhe probleme serioze në infrastrukturë.

Vështirësi janë raportuar edhe në Institucionin e Ekzekutimit të Vendimeve Penale në Durrës, ku uji ka depërtuar në tetë qeli në katin e parë të godinës. Për të përballuar situatën emergjente, autoritetet kanë ndërhyrë duke dërguar pompa për largimin e ujit dhe për të shmangur përkeqësimin e mëtejshëm të kushteve.

Në këtë institucion ndodhen rreth 300 persona të paraburgosur, ndërsa në katin e parë, ku janë evidentuar përmbytjet, mbahen edhe kryebashkiaku i Tiranës, Erion Veliaj, si dhe ish-ministri i Shëndetësisë, Ilir Beqaj.

Autoritetet po monitorojnë nga afër situatën, ndërsa ndërhyrjet vijojnë për normalizimin e kushteve brenda institucionit dhe garantimin e sigurisë së të paraburgosurve.