Plagoset me armë zjarri 39-vjeçari në Kavajë, arrestohet autori

Një konflikt i çastit në Kavajë ka përfunduar me plagosje me armë zjarri dhe dy persona në pranga, falë ndërhyrjes së shpejtë të policisë.

Sipas burimeve zyrtare, një 42-vjeçar dyshohet se ka qëlluar me pistoletë një 39-vjeçar pas një përplasjeje për motive të dobëta. I plagosuri u transportua menjëherë në spital dhe ndodhet jashtë rrezikut për jetën.

Pas sinjalizimit për ngjarjen, shërbimet e Policisë së Kavajës, në bashkëpunim me strukturat e Drejtorisë Vendore të Policisë Durrës, organizuan një operacion të menjëhershëm për identifikimin dhe kapjen e autorit. Brenda rreth tre orësh, ai u lokalizua në Durrës dhe u vu në pranga.

Gjatë veprimeve hetimore u arrestua edhe një 35-vjeçar, i cili dyshohet se ka ndihmuar autorin të largohej nga vendngjarja, duke e transportuar me automjet drejt Durrësit.

Policia bëri të mundur edhe gjetjen e armës së zjarrit të përdorur në plagosje, të cilën autori dyshohet se e kishte hedhur në shkurre gjatë arratisjes. Pistoleta u sekuestrua në cilësinë e provës materiale.

Ndërkohë, në bashkëpunim me Prokurorinë, vijojnë hetimet për zbardhjen e plotë të rrethanave të ngjarjes dhe dokumentimin ligjor të saj.