Plagosja e 18-vjeçares në Sauk, arrestohen babai dhe kushëriri i të dashurit të saj

Policia e Tiranës ka shoqëruar dhe proceduar dy persona në lidhje me ngjarjen e ndodhur më 14 shkurt 2026 në zonën e Saukut, ku një 18-vjeçare mbeti e plagosur pasi dyshohet se u vetëplagos me armë zjarri.

Burime zyrtare bëjnë me dije se bëhet fjalë për shtetasit Saimir Gjuta dhe Elvir Gjuta, përkatësisht babai dhe kushëriri i Erisjaldo Gjutës, i cili dyshohet se kishte në posedim armën e zjarrit me të cilën e reja u plagos.

Sipas Policisë, dy të dyshuarit ishin shpallur më herët në kërkim, pasi akuzohen për veprat penale “Moskallëzimi i krimit” dhe “Veprime që pengojnë zbulimin e së vërtetës”, të kryera në bashkëpunim.

“Specialistët për Hetimin e Krimeve kundër Jetës dhe Pronës bënë kapjen e shtetasve S. Gj. dhe E. Gj., të cilët ishin në kërkim në lidhje me ngjarjen e ndodhur më 14.02.2026 në Sauk, ku një 18-vjeçare u vetëplagos me armë zjarri”, njofton policia.

Pas konsultimeve me Prokurorinë, është vendosur që dy personat të procedohen penalisht, por të hetohen në gjendje të lirë, ndërsa hetimet për zbardhjen e plotë të rrethanave të ngjarjes vijojnë.