Po shuanin zjarret, dy helikopterët grek përplasen në ajër

Dy helikopterë që merrnin pjesë në operacionet për shuarjen e zjarreve janë përplasur në ajër në zonën e Psathës, në Greqi, duke shkaktuar alarm dhe një operacion të gjerë kërkim-shpëtimi.

Sipas mediave greke, të dy mjetet ajrore ishin ngritur nga aeroporti ushtarak i Elefsinës dhe ishin angazhuar në ndërhyrjet ajrore për vënien nën kontroll të flakëve që kanë përfshirë zonën.

Raportimet paraprake bëjnë të ditur se ekuipazhi i njërit prej helikopterëve ka arritur të komunikojë me autoritetet dhe është konfirmuar se anëtarët e tij janë gjallë. Ndërkohë, për ekuipazhin e helikopterit tjetër ende nuk ka informacion zyrtar, ndërsa kërkimet vijojnë.

Sipas të dhënave të deritanishme, pilotët e të dy helikopterëve janë me origjinë rumune, ndërsa koordinatorët e misionit janë shtetas grekë. Helikopterët ishin marrë me qira nga Shërbimi Zjarrfikës i Greqisë dhe secili prej tyre kishte nga dy persona në bord.

Menjëherë pas përplasjes, në vendngjarje janë dislokuar katër autoambulanca të shërbimit të urgjencës, si dhe një njësi e lëvizshme mjekësore, ndërsa operacioni i kërkim-shpëtimit vazhdon për gjetjen e personave që ndodheshin në helikopterin me të cilin është humbur kontakti.

Autoritetet greke pritet të japin një bilanc zyrtar dhe më shumë detaje mbi shkaqet e aksidentit sapo të përfundojnë operacionet në terren.