Prokurori përfundon në pranga, momenti kur arrestohet në zyrë

Prokurori Beqë Shala, i angazhuar në Departamentin e Përgjithshëm të Prokurorisë Themelore në Prizren, është arrestuar sot me urdhër të Prokurorisë Speciale.

Operacioni u realizua nga hetuesit e Drejtorisë për Hetimin e Krimit të Organizuar dhe Krimeve të Rënda në Policinë e Kosovës, në bashkëpunim me kryeprokurorin e Prokurorisë Themelore në Prizren, Petrit Kryeziu.

Sipas njoftimeve zyrtare, Shala dyshohet për veprën penale të “marrjes së ryshfetit”, por ende nuk është bërë e qartë në lidhje me cilën çështje konkrete lidhet kjo akuzë.

Prokuroria bën me dije se arrestimi i tij u krye në vendin e punës dhe se hetimet vazhdojnë sipas Kodit të Procedurës Penale dhe ligjeve në fuqi, ndërsa strukturat e Policisë së Kosovës dhe Prokurorisë Speciale po ndërmarrin të gjitha veprimet e nevojshme për zbardhjen e plotë të rastit.