Prostitucion në Durrës, procedohen brazilianet dhe klientët shqiptarë

Dy shtetase nga Brazili janë proceduar penalisht pasi dyshohet se kishin përshtatur një apartament në Durrës për ushtrimin e prostitucionit. Në të njëjtën çështje, Policia ka nisur procedim penal edhe ndaj dy shtetasve shqiptarë, të identifikuar si klientë.

Operacioni u finalizua nga Seksioni për Hetimin e Trafiqeve, me mbështetjen e Forcës së Posaçme Operacionale, në kuadër të fazës së 14-të të operacionit policor të koduar “Storm”, i ndjekur me metoda speciale hetimi për një periudhë dyjavore.

Si rezultat i veprimeve hetimore, u proceduan në gjendje të lirë shtetaset Th. C., 35 vjeçe, dhe A. F., 39 vjeçe, lindur në Brazil, për veprat penale “Prostitucion” dhe “Përshtatja e ambienteve për prostitucion”. Po ashtu, për veprën penale “Prostitucioni”, u proceduan në gjendje të lirë edhe dy shtetas shqiptarë, E. D. dhe S. A., banues në Durrës.

Gjatë kontrollit në ambientet e përshtatura për këtë aktivitet, policia sekuestroi në cilësinë e provës materiale një shumë të konsiderueshme parash në valuta të ndryshme: 1 080 euro, 116 700 lekë, 120 dollarë amerikanë, 80 paund britanikë, 150 franga dhe 3 430 dinarë. Gjithashtu u sekuestruan dy pasaporta të shtetaseve të huaja, tetë aparate celularë, karta telefoni dhe blloqe shënimesh.

Nga hetimet rezultoi se dy shtetaset kishin marrë me qira një apartament në zonën e Vollgës, në lagjen nr. 1 të qytetit të Durrësit, të cilin e kishin përshtatur posaçërisht për ushtrimin e aktivitetit të prostitucionit.

Materialet proceduriale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.