Protestat në Greqi, ‘paralizohet’ sërish aksi Kakavijë-Janinë

Policia Kufitare e Kakavijës njofton se, sipas informacionit të marrë nga autoritetet greke, sot nga ora 18:00 deri në 21:00, aksi rrugor Kakavijë–Janinë në zonën e fshatit Kallpaq do të mbetet i bllokuar për shkak të një proteste të organizuar nga fermerët grekë.

Autoritetet bëjnë me dije se gjatë këtij intervali do të lejohet qarkullimi vetëm i automjeteve të emergjencave shëndetësore, përfshirë ambulancat dhe mjetet e policisë. Qytetarët dhe shoferët që planifikojnë të kalojnë këtë rrugë paralajmërohen të tregojnë mirëkuptim dhe të shmangin vonesat duke planifikuar udhëtimet në orare të tjera të ditës.

Bllokimi i aksit pritet të ndikojë në trafikun lokal, ndërsa autoritetet greke po monitorojnë situatën për të garantuar sigurinë e pjesëmarrësve dhe të udhëtarëve. Policia kufitare paralajmëron se çdo automjet që përpiqet të kalojë gjatë orarit të protestës do të devijohet për të ruajtur rendin dhe sigurinë në zonë.