Protestat/ Zv.presidenti i PE-së: Shqiptarë, nuk jeni vetëm!

Nicolae Ștefănuță flet për protestat mbi 100-ditore në Tiranë dhe ngre shqetësime për arrestimet, gazetarët dhe mbylljen e llogarive në rrjetet sociale.

Zhvillimet e lidhura me protestat e zhvilluara prej më shumë se 100 ditësh në Tiranë kanë tërhequr vëmendjen edhe në institucionet europiane. Zëvendëspresidenti i Parlamentit Europian, Nicolae Ștefănuță, ka deklaruar nga Strasburgu se situata në Shqipëri po ndiqet nga afër dhe ka shprehur solidaritet me qytetarët që kanë marrë pjesë në protestë.

Në deklaratën e tij, Ștefănuță u ndal veçanërisht te raportimet për arrestime të protestuesve, si edhe te pretendimet për kufizime ndaj gazetarëve dhe llogarive në rrjetet sociale që kanë transmetuar apo dokumentuar zhvillimet e protestave.

Duke folur për situatën në Shqipëri, zëvendëspresidenti i PE tha se protestuesit po përballen me presion institucional ndërsa vijojnë të dalin në rrugë.

“Jam këtu për të folur për shqiptarët që po drejtojnë një revolucion për më shumë se 100 ditë. Dalin në protestë çdo ditë dhe tani po arrestohen nga policia. Gazetarët po censurohen. Rrjetet sociale të atyre që po pasqyrojnë protestën po mbyllen”, u shpreh ai.

Më tej, politikani europian iu drejtua drejtpërdrejt qytetarëve shqiptarë, duke theksuar se zhvillimet në vend po ndiqen nga Europa.

Sipas Ștefănuță, ai vetë ka qenë në Tiranë dhe ka marrë pjesë në protestë, ndërsa tha se ka komunikuar me qytetarët që janë pjesë e saj.

“Dhe më lejoni t’ju drejtohem shqiptarëve: Ne ju ndjekim nga këtu. Ne e shohim se çfarë po ndodh në Shqipëri. Unë kam qenë atje. Kam qenë në Tiranë. Kam protestuar me këta njerëz. Kam folur me ta dhe më shkruajnë çdo ditë”, tha ai.

Në vijim, zëvendëspresidenti i Parlamentit Europian përcolli një tjetër mesazh për protestuesit, duke përmendur kërkesat për transparencë, luftën kundër korrupsionit, mbrojtjen e natyrës dhe të drejtat e qytetarëve.

“Ju nuk jeni vetëm, shqiptarë. Nuk jeni vetëm në përpjekjet tuaja për transparencë, kundër korrupsionit, për natyrën dhe të drejtat tuaja”, deklaroi Ștefănuță.

Ai kërkoi gjithashtu respektimin e rregullave dhe standardeve europiane nga institucionet shqiptare, duke e lidhur këtë me procesin e integrimit të Shqipërisë në Bashkimin Europian.

“Shteti shqiptar, nëse do të jesh në Europë, duhet të respektosh rregullat. Të respektosh shqiptarët dhe ne jemi me ta”, përfundoi ai.

Deklarata e Nicolae Ștefănuță:

“Jam këtu për të folur për shqiptarët që po drejtojnë një revolucion për më shumë se 100 ditë. Dalin në protestë çdo ditë dhe tani po arrestohen nga policia. Gazetarët po censurohen. Rrjetet sociale të atyre që po pasqyrojnë protestën po mbyllen.

Dhe më lejoni t’ju drejtohem shqiptarëve: Ne ju ndjekim nga këtu. Ne e shohim se çfarë po ndodh në Shqipëri. Unë kam qenë atje. Kam qenë në Tiranë. Kam protestuar me këta njerëz. Kam folur me ta dhe më shkruajnë çdo ditë.

Ju nuk jeni vetëm, shqiptarë. Nuk jeni vetëm në përpjekjet tuaja për transparencë, kundër korrupsionit, për natyrën dhe të drejtat tuaja.

Shteti shqiptar, nëse do të jesh në Europë, duhet të respektosh rregullat. Të respektosh shqiptarët dhe ne jemi me ta.”