Protestuesit sulmojnë selitë e PD-së dhe PS-së në Shkodër

Protesta e studentëve dhe gjimnazistëve është përshkallëzuar edhe në Shkodër, ku disa prej protestuesve kanë goditur me gurë selitë e Partisë Demokratike dhe Partisë Socialiste, si dhe kanë shënjestruar godinën e Bashkisë. Incidentet kanë shkaktuar dëme materiale, ndërsa forcat e policisë janë pozicionuar për të parandaluar agravimin e mëtejshëm të situatës.

Fillimisht, një grup të rinjsh është drejtuar drejt selisë së Partisë Demokratike, ku ka goditur me gurë godinën dhe ka thyer xhamat e saj. Situata është përshkallëzuar më tej kur disa protestues kanë hyrë brenda ambienteve të selisë, duke shkaktuar dëmtime.

Përveç dëmeve në godinë, në muret e selisë së demokratëve është shkruar me bojë mesazhi fyes “PD – Partia e derrave”. Gjithashtu, janë dëmtuar dyert dhe lulet dekorative në ambientet përreth.

Më pas, protestuesit kanë lëvizur drejt selisë së Partisë Socialiste, ku kanë hedhur gurë në drejtim të ndërtesës, duke thyer edhe aty xhamat. Në murin e godinës është shkruar me bojë të kuqe mesazhi “Mbroni gjakun tuaj”, ndërsa tensionet janë shoqëruar me thirrje kundër qeverisë.

Gjatë tubimit, të rinjtë kanë kërkuar dorëheqjen e kryeministrit Edi Rama, duke brohoritur edhe sloganin “Pa rini nuk ka Shqipëri”.

Përballë situatës së krijuar, policia ka vendosur një kordon sigurie pranë selisë së Partisë Socialiste. Qëllimi është parandalimi i incidenteve të tjera dhe mbajtja nën kontroll e situatës.

Në shënjestër të protestuesve ka qenë edhe Bashkia e Shkodrës. Deri më tani, nuk ka një bilanc të plotë zyrtar për dëmet e shkaktuara në godinat e prekura nga incidentet.

Përshkallëzohen protestat edhe në Tiranë, gjimnazistët i bashkohen tubimeve

Tensionet nuk janë kufizuar vetëm në Shkodër. Edhe në Tiranë, pas përplasjeve të regjistruara mes protestuesve dhe policisë në Rrugën e Durrësit, një grup i madh të rinjsh ka vijuar marshimin në akse të ndryshme të kryeqytetit.

Protesta në Tiranë

Protestuesit janë nisur nga Bulevardi “Dëshmorët e Kombit”, kanë vijuar përgjatë Unazës dhe janë drejtuar drejt kryqëzimit të Rrugës së Elbasanit. Gjatë lëvizjes, disa prej tyre kanë dëmtuar semaforë dhe kamera sigurie të vendosura në shtyllat përgjatë rrugës.

Protesta shtrihet në qytete të tjera

Tubimeve të kësaj të enjteje u janë bashkuar edhe shumë gjimnazistë. Ndërsa bojkotimi i mësimit dhe protestat janë shtrirë përtej kryeqytetit, duke përfshirë edhe Durrësin, Korçën dhe Vlorën.

Mobilizimi i studentëve dhe gjimnazistëve vijon prej tri ditësh. Në disa prej qyteteve, protestat janë shoqëruar me përplasje me forcat e rendit dhe dëmtime të pronës publike e private. Kjo ka rritur tensionet gjatë tubimeve.

Tensione në vazhdim

Zhvillimet në Shkodër dhe Tiranë tregojnë se protesta po merr përmasa më të gjera. Ndërsa situata mbetet e tensionuar në disa zona të vendit.