Puthje dhe betim mes kaosit, Shabani ‘tërbon’ opozitën në Kuvend

Kaos, tensione dhe përleshje fizike shoqëruan seancën e sotme plenare në Kuvend, ku Endrit Shabani u betua si Avokat i Popullit mes fërshëllimave dhe protestave të opozitës.

Që në nisje të seancës, deputetë të Partisë Demokratike bllokuan Foltoren dhe zunë vendet e ministrave në sallën plenare, duke sjellë ndërprerje të punimeve dhe ndërhyrjen e Gardës.

Në sallë u përdorën flakadanë dhe mjete piroteknike, ndërsa deputetët e PD hodhën shishe uji dhe kartonët e votimit. Situata u përshkallëzua në përplasje verbale dhe fizike mes deputetëve të opozitës, mazhorancës dhe forcave të sigurisë.

Pavarësisht tensioneve, Endrit Shabani u betua si Avokat i Popullit, duke reaguar në mënyrë provokuese ndaj opozitës, madje duke i drejtuar asaj edhe një puthje, gjest që shtoi më tej irritimin në sallë.

Kreu i Partisë Demokratike, Sali Berisha, akuzoi mazhorancën se po mbron “hajdutët” dhe kërkoi dorëzimin e zëvendëskryeministres Belinda Balluku dhe të Ergys Agasit. Ai paralajmëroi pasoja të rënda ligjore për këdo që, sipas tij, prek deputetët e opozitës.

Në të njëjtën kohë, Berisha deklaroi se deputeti Ervin Salianji është vetëpërjashtuar nga Partia Demokratike, duke theksuar se qëndrimi i tij për bashkëpunimin me krimin mbetet një “vijë e kuqe” e panegociueshme për PD-në.

Seanca u zhvillua mes tensioneve të vazhdueshme, me ndërprerje të shpeshta dhe me një klimë politike të rënduar, duke e kthyer Kuvendin në skenë kaosi dhe përplasjesh të ashpra politike.