Qytetarët e Shqipërisë nuk janë më të varfërit në Europë rastësisht?!

Politika shqiptare ka dështuar në mënyrë të qëllimshme në krijimin e institucioneve  dhe një shteti të konsoliduar demokratik që mund të ndërtojnë një të ardhme dhe një jetesë më të mirë  për qytetarët e saj. Kjo është arsyeja pse varfëria në Shqipëri është një realitet i vazhdueshëm për shumicën e popullsisë.

Ndryshe nga vendet me institucione gjithëpërfshirëse, Shqipëria ka ndërtuar institucione përjashtuese dhe të korruptuara që mbrojnë interesat e elitave të fuqishme dhe politikanëve që e kanë përqendruar pushtetin dhe pasurinë në duart e tyre.

Politika ka ndjekur një model që përjashton qytetarin e thjeshtë nga vendimmarrja, duke përdorur korrupsionin, nepotizmin dhe autokracinë si mjete për të mbajtur kontrollin.

Në vend që të krijohej një strategji për zhvillim të qëndrueshëm dhe ndihmë për të varfërit, qeveria e ka degraduar vendin në një situatë ku më shumë se 20% e popullsisë jeton nën pragun e varfërisë, një përqindje që është më e lartë se në shumë vende të tjera të rajonit.

Elitat politike, majtas dhe dhathtas, në vend që të ndërtojnë institucione që mbështesin demokracinë dhe përparimin ekonomik, kanë vendosur barriera për zhvillimin e vendit dhe kanë përqendruar të gjitha burimet në duart e një pakice.

Shqipëria nuk është varfëruar rastësisht—ajo është varfëruar qëllimisht nga një klasë politike që ka shpërfillur interesat e qytetarëve dhe ka çuar përpara një sistem që përfiton vetëm një grusht njerëzish.

Në thelb, varfëria e Shqipërisë është një pasojë e drejtpërdrejtë e institucioneve politike të korruptuara dhe të paqëndrueshme që e kanë tradhtuar qytetarin shqiptar. Derisa qytetarët të angazhohen për të rrëzuar këtë sistem të kalbur, Shqipëria do të vazhdojë të jetë e varfër dhe qytetarët e saj të përballen me një të ardhme pa perspektivë.