Rama e gjen më kollaj një ministër pa dosje në Spak se një pronar restoranti në JUG një kamarier

Ermal Hasimja

Nja 2 reflektime për turizmin:
1. Më duket se turistë ka më pak se vjet. Gjithsesi shumë më pak se pritshmëritë.
2. Qeveria ngatërron qëllimshëm turistët me përdoruesit e Rinasit dhe portit të Durrësit. Mes turistëve numëron edhe Valonin prej Gjeneve që shkon me makinë në Prishtinë, edhe Draganin e Nikshiqit që shkon në Londër prej Tirane se ka gjetur bileta më të lira.
3. Çmimet janë rritur, por jo shumë. Te restorantet jemi ende 2 herë më lirë se në Paris a Romë dhe nja 30% më lirë se në Spanjë e Greqi.
4. Para se të shani pronarët për rritjen e çmimeve pyetini njëherë si ia bëjnë për të gjetur staf dhe sa u kushtojnë rrogat. E ka më kollaj Rama të gjejë ministër pa dosje në SPAK sesa një pronar restoranti një kamarier. Hotelet e restorantet duhet të gjejnë punonjës sezonalë për një sezon 2-3 mujor. Ka një arsye pse kudo kanë nisur të shfaqen punonjës aziatikë ndërkohë që kafet e Tiranës janë plot me të rinj që nuk e ulin hundën me punë të tilla “jodinjitoze”.
5. Shteti punon vetëm për taksat e gjobat. Për të tjerat …. Vlora e Shëngjini, plehrat kudo, e tregojnë qartë. Vazhdon tradita e punimeve në rrugë në mes te sezonit.
6. Kam njëfarë shprese se sipërmarrësit do t’ia dalin t’i përshtaten situatës duke përmirësuar veten e duke u bërë më konkurrentë.
7. Pyetja e madhe është: a do t’ia dalim ta bëjmë Shqipërinë tërheqëse përpara se të mbarojë turizmi i kureshtjes dhe turizmi i çmimeve të lira.