Rama krekoset me dy medaljet Olimpike nga të huajt Valiev e Dudaev

Përditësuar më 11 Gusht 2024, 16:23

Naim  Noka

Kujt do t’i kishte shkuar mendja se Shqipëria, vendi i shqipeve dhe i talenteve të lindura për sport, do të krekosej në podiumin olimpik… falë dy sportistëve të huaj? Po, po, nuk është shaka! Kryeministri Edi Rama, me një krenari që mund ta  kishte  zili  gjeli  më i mirë i Frances në mes të oborrit, ka përfituar nga ky moment historik për të treguar një herë e mirë se hudhra shqiptare jo vetëm që largon syrin e keq, por i sjell edhe medalje olimpike.

“Ja dhe medalja e dytë olimpike në historinë tonë!” shkruan Rama me entuziazëm në Facebook, duke shpërndarë foto të Islam Dudaev që valëvit flamurin shqiptar pas fitores së tij të bronztë.  Rama, me një gjysmë buzëqeshje ironike, i çarmatosi të gjithë skeptikët që gëlojnë buzë kënetave të kritikës  me një thirrje triumfatori: “Kush nuk di të gëzohet, le të pijë një gotë raki me hudhër, ndoshta i vjen mendja!”

Epo, ja që sporti është sport, dhe kushdo që vesh fanellën kuqezi, qoftë ai Ymer Pampuri në vitin 1972 apo Chermen Valiev e Islam Dudaev sot, meriton të nderohet me gjithë zemër.  Rama që ka mbajtur  kapele  nuk ka si të ketë mizë nën kësulë. Rama duhet   kujtuar se suksesi i Shqipërisë nuk është më i vështirë për t’u falur se një thes me flori. Eurot, floririn dhe pasuritë e vendit të shqipeve  ose po i fal ose i ke falur. Mes varfërisë  dhe triumfit të një grushti  hajdutësh sigurisht qytetarët dhe votuesit e tu i gëzohen  edhe suksesit  në Olimpiadë të dy të huajve :   Chermen Valiev e Islam Dudaev. Gëzimi do të ishte qindfish nëse dy fituesit  do të ishin  dy shqiptarë.

Por  le ti  gëzohemi medaljeve  dhe  flamurit kuqezi në Paris dhe ta shpëtojmë këtë  moment  të gëzuar olimpik  nga tallavaja politiko-medatike e hudhrës kryeministrore.

I dashur kryeministër  ti ke të drejtën e zotit, që të  vazhdosh e të krekosesh  për medaljet e dy të huajve, apo sukseset e miliona turistëve  që po ‘pushtojnë’ vendin e shqipeve, ndërsa   hudhra shqiptare le të mbetet aleati më i fuqishëm në betejën kundër syrit të keq… dhe ndoshta, ndoshta një ditë, do të jetë vetë Shqipëria që do të fitojë medaljet, jo vetëm përmes “importit” sportiv.  Fidelët e partisë   që krenohen me mundësit rusë dhe çeçenë  të kursejnë pak euro që vjedhin nga fondet e sportit  dhe të  blejnë  minimumi  një flamur “Made in Albania” jo imitim kinez  sepse, nëse medaljet janë nga rusi dhe çeçeni, krenaria duhet të mbetet shqiptare.

Meqë edhe  të dielën e nxore mizën nën kapelen turistike nga vila e Dhërmiut, le të gëzohemi për medaljet historike me një teke raki Vunoi! Gëzuar!