Rama mbledh ‘klanin’ e PS para nisjes për Bruksel, Balluku s’largohet

Kryeministri Edi Rama ka mbledhur grupin parlamentar të Partisë Socialiste paraditen e sotme, pak orë përpara nisjes së tij drejt Brukselit. Mbledhja zhvillohet në një moment tensioni politik dhe institucional, ndërsa në fokus është edhe situata e krijuar pas vendimeve të fundit të Gjykatës Kushtetuese.

Pjesë e takimit është edhe Belinda Balluku, e cila, ndonëse e pezulluar nga detyra e zv/kryeministres dhe ministres së Infrastrukturës, vijon të marrë pjesë në mbledhjet e grupit si deputete e Partisë Socialiste. Prania e saj në këtë mbledhje vjen në një kohë kur çështja e saj pritet të zhvendoset në Kuvend.

Pas zhvillimeve në Gjykatën Kushtetuese, hapi i radhës pritet të jetë mbledhja e Komisionit të Mandateve, ku do të shqyrtohet kërkesa e SPAK për heqjen e imunitetit parlamentar të Ballukut. Prokuroria e Posaçme synon autorizimin e Kuvendit për arrestimin e saj, në kuadër të hetimeve për çështjen që lidhet me akuzat për shkelje të barazisë në tendera.

Ndërkohë, kryeministri Rama pritet të niset rreth orës 14:00 drejt Brukselit, ku do të zhvillojë një takim me presidentin e Këshillit Evropian, Antonio Costa. Në qendër të diskutimeve do të jenë negociatat për anëtarësimin e Shqipërisë në Bashkimin Evropian dhe ecuria e reformave që lidhen me procesin integrues.