Ramush Haradinaj rrëfen vrasjen e vëllait dhe luftën ndaj Serbisë

Ish-kryeministri i Kosovës, Ramush Haradinaj, ka ndarë një nga kujtimet më të dhimbshme të jetës së tij gjatë një aventure në mal me emisionin “Të Guximshmit”.

Haradinaj u ndal te vrasja e vëllait të tij, Luan Haradinajt, në vitin 1997, duke rrëfyer vështirësinë emocionale për të pranuar humbjen e një prej njerëzve më të afërt të familjes.

Ai e përshkroi këtë ngjarje si një moment që ndryshoi gjithçka për të, ndërsa kujtoi edhe dhimbjen e përjetuar gjatë luftës në Kosovë.

“Rasti i pritës kur isha me vëllanë, me Luanin, vrasja… Kur vritet i pari i familjes tënde, është një ndryshim i madh që nuk e pranon lehtë, e mohon. Luani është vrarë në ’97. Lufta ka qenë e vështirë, e dhimbshme, e dhunshme, edhe nga ana emocionale. Kur humb njerëz, është e rëndë”, u shpreh Haradinaj.

Rrëfimi i tij solli në vëmendje jo vetëm humbjen personale, por edhe peshën emocionale që shoqëroi vitet e luftës në Kosovë dhe humbjen e njerëzve të afërt.