Rëndohet situata në aksin Librazhd-Prrenjas, ARRSH s’di kur hapet

Situata është përkeqësuar nga rrëshqitjet e dherave në aksin rrugor Librazhd-Prrenjas, në zonën e njohur si Arrat e Gurrës. Rrëshqitjet e tokës kanë dëmtuar edhe trasenë e rrugës së re, e cila është pjesë e projektit të Korridori VIII.

Autoritetet janë në pritje të një raporti nga Shërbimi Gjeologjik Shqiptar për të përcaktuar shkaqet e situatës së rënduar dhe për të vlerësuar stabilitetin e terrenit.

Ndërkohë, drejtori i Autoriteti Rrugor Shqiptar, Ami Kozeli, deklaroi në një emision televiziv se ende nuk ka një përfundim përfundimtar dhe se priten rezultatet e studimeve gjeologjike.

ARRSH: Segmenti mbetet i bllokuar

Në një njoftim për qytetarët, ARRSH bëri të ditur se qarkullimi do të vazhdojë të jetë i bllokuar në segmentin në zonën e Arrat e Gurrës, pjesë e aksit Librazhd-Pogradec. Ky segment, që pritej të hapej gjatë mesditës së sotme, është bërë i pakalueshëm për shkak të rrëshqitjeve masive të dheut.

Për arsye sigurie janë tërhequr edhe mjetet e firmës zbatuese, ndërsa është ndaluar qarkullimi i mjeteve dhe këmbësorëve. Specialistët po kryejnë një rivlerësim urgjent gjeologjik dhe teknik, pasi terreni paraqitet i paqëndrueshëm dhe i rrezikshëm për ndërhyrje.

Në terren po shqyrtohet mundësia që të krijohet një kalim i përkohshëm vetëm për automjete të vogla dhe për mjetet e emergjencës në një rrugë alternative pranë zonës.

Rrugët alternative për drejtuesit e mjeteve

Autoriteti Rrugor Shqiptar u ka sugjeruar drejtuesve të mjeteve të përdorin disa akse alternative:

Për autoveturat:

• Maliq – Lozhan – Strelc – Gramsh – Elbasan

• Qafë Thanë – Pogradec – Korçë – Leskovik – Përmet – Tepelenë

Për mjetet e tonazhit të rëndë:

• Qafë Thanë – Maqedonia e Veriut – Bllatë – Rruga e Arbërit

ARRSH u ka kërkuar drejtuesve të mjeteve dhe banorëve të zonës të tregojnë kujdes maksimal dhe të ndjekin sinjalistikën rrugore si dhe udhëzimet e Policisë Rrugore.

Rruga që lidh Librazhdin me Prrenjasin është bërë e pakalueshme që prej 21 shkurtit 2026 për shkak të shembjeve të tokës.