Bllokohet rruga e fshatit Zall Dardhë

Si pasojë e reshjeve të shiut dhe dëborës, Qarku Dibër vijon të përballet me disa problematika të izoluara, ndërsa në tërësi situata paraqitet e qëndrueshme dhe e menaxhueshme.

Reshjet e shiut po vazhdojnë me intensitet të ulët, ndërkohë që dëbora ka nisur të shfaqet në zonat mbi 600 metra mbi nivelin e detit.

Në Bashkinë Dibër, njësia administrative Zall Dardhë, rruga e fshatit është bllokuar përkohësisht për shkak të rrëshqitjes së një masivi dheu. Në terren po punojnë mjete të rënda për hapjen dhe rikthimin e qarkullimit. Po në këtë bashki, në njësinë administrative Tomin, fshati Zdojan, dalja nga shtrati e përroit ka rrezikuar përmbytjen e disa hektarëve tokë bujqësore dhe tre banesave. Bashkia ka ndërhyrë me fadromë për normalizimin e situatës. Ndërkohë, në njësinë administrative Kastriot, fshati Kishavec, vijon puna për thellimin e shtratit të përroit, ndërsa në Arras, fshati Mustafe, po kryhet pastrimi i rrugës nga dherat dhe gurët e rënë.

Në Bashkinë Mat, në njësitë administrative Macukull dhe Derjan, janë regjistruar reshje dëbore me trashësi rreth 10 centimetra. Në fshatin Karicë, lagjja Doçi, është konstatuar një rrëshqitje në trupin e rrugës, ku po punohet për stabilizimin e saj.

Në Bashkinë Bulqizë, reshjet e dëborës kanë arritur deri në 10 cm, por pa shkaktuar problematika, ndërsa në Bashkinë Klos po vijon puna për zgjidhjen e problematikave të mbartura nga ditët e mëparshme dhe nuk raportohen situata të reja.

Në rrugën nacionale Peshkopi–Vasije, si dhe në segmentin e Rrugës së Arbrit, në aksin Fushë Bulqizë–Plan i Bardhë, ka prani dëbore deri në 10 cm. Operatorët kontraktorë janë në terren për pastrimin dhe garantimin e qarkullimit normal. Akset e tjera nacionale raportohen të hapura.

Autoritetet bëjnë me dije se furnizimi me energji elektrike dhe ujë të pijshëm në të gjithë territorin e qarkut është normal, ndërsa situata vijon të monitorohet në mënyrë të pandërprerë nga strukturat përkatëse.