Rikthehet “Hosteni”, revista ikonike e humorit që i mbijetoi diktaturës

Pas më shumë se tri dekadash mungesë, revista satirike “Hosteni” rikthehet në tregun shqiptar, për të sjellë sërish humorin, ironinë, sarkazmën dhe karikaturën, në një traditë që nisi që në vitin 1945, këtë herë si portal për publikun shqiptar.

E lindur në një periudhë të trazuar të historisë së Shqipërisë, “Hosteni” arriti t’i mbijetojë edhe diktaturës, duke u kthyer ndër vite në një prej simboleve të humorit dhe satirës shqiptare. Revista ikonike mungonte në treg që prej vitit 1992, duke lënë pas një boshllëk në një zhanër që ndërthur argëtimin me kritikën shoqërore.

Rikthimi i saj, në version si portal, synon të sjellë sërish në vëmendje fuqinë e humorit si mënyrë për të komentuar realitetin, përmes analizave, ironisë dhe karikaturave që shpesh thonë më shumë se fjalët e drejtpërdrejta.

Në një kohë kur debati publik është gjithnjë e më i zhurmshëm, “Hosteni” vjen me gjuhën e vet karakteristike: humorin që thumbon, ironinë që ekspozon kontradiktat dhe sarkazmën që godet me zgjuarsi.

Rikthimi i portalit “Hosten” përbën një përpjekje për të ringjallur një traditë të njohur të shtypit satirik shqiptar dhe për t’i dhënë sërish hapësirë një forme gazetarie ku e qeshura mund të jetë edhe një mënyrë për të thënë të vërteta të pakëndshme.