Robert Aliaj Dragot shpërthen ndaj policisë: A keni familje? A keni fëmijë?

Artisti Robert Aliaj Dragot ka reaguar ashpër përmes një postimi në rrjetet sociale, ku ka akuzuar efektivët e Policisë së Shtetit dhe të RENEA-s për dhunën ndaj protestuesve, duke përmendur edhe të miturit, studentët dhe të rinjtë.

Në reagimin e tij, Aliaj u drejtohet efektivëve me një sërë pyetjesh mbi përgjegjësinë morale dhe njerëzore për veprimet e tyre gjatë protestave. Ai shpreh indinjatën për mënyrën se si, sipas tij, janë trajtuar demonstruesit, ndërsa ngre shqetësimin për pasojat që këto ngjarje mund të kenë te familjet e tyre.

“A keni familje? A keni fëmijë? A keni ju gra?”, shkruan artisti, duke e zhvendosur vëmendjen edhe te familjarët e punonjësve të policisë dhe reagimi i tyre ndaj situatës.

Aliaj kritikon gjithashtu heshtjen e familjarëve të efektivëve, duke ngritur pikëpyetje mbi qëndrimin e tyre përballë asaj që ai e cilëson si dhunë ndaj të rinjve dhe protestuesve të pafajshëm.

Në një pjesë tjetër të reagimit, artisti përdor tone të forta ndaj institucioneve shtetërore, duke e cilësuar situatën si diktaturë dhe duke e mbyllur mesazhin me thirrjen: “Poshtë diktatura”.

Postimi i Robert Aliaj Dragot vjen në një klimë të tensionuar politike, ku protestat në Tiranë dhe përplasjet mes demonstruesve dhe forcave të rendit kanë nxitur reagime të shumta publike.