Një ngjarje e rëndë rrugore është regjistruar në lagjen Varosh të Gjirokastër, ku një aksident i ndodhur dy ditë më parë ka sjellë pasoja të konsiderueshme materiale dhe disa të lënduar.
Sipas informacioneve zyrtare, në aksident janë përfshirë katër automjete, të cilat janë dëmtuar si pasojë e përplasjes me një kamion në pronësi të bashkisë. Si rrjedhojë e goditjes, tre persona kanë pësuar dëmtime të lehta dhe kanë marrë ndihmën mjekësore në spital, jashtë rrezikut për jetën.
Autoritetet bëjnë me dije se drejtuesi i kamionit, një 55-vjeçar me inicialet V.B., rezulton të jetë punonjës i Sektorit të Mirëmbajtjes pranë Drejtorisë së Shërbimeve Komunitare në Gjirokastër. Nga verifikimet e kryera, ai dyshohet se ka qenë në gjendje të dehur në momentin e aksidentit.
Policia ka ndërhyrë menjëherë në vendngjarje dhe, pas kryerjes së procedurave përkatëse, ka bërë arrestimin në flagrancë të drejtuesit të mjetit. Ndaj tij rëndojnë akuzat për drejtim automjeti në gjendje të parregullt dhe shkelje të rregullave të qarkullimit rrugor.
Ndërkohë, materialet hetimore i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm në Gjirokastër, e cila do të vijojë me veprimet e mëtejshme procedurale për zbardhjen e plotë të rrethanave të ngjarjes.
