Shpërndarja e videove intime në rrjet, Policia nis hetimet

Policia e Tiranës ka nisur hetimet pas publikimit dhe shpërndarjes në portale dhe platforma online të materialeve filmike me përmbajtje intime. Çështja po hetohet nga Sektori për Hetimin e Krimeve Kibernetike.

Sipas njoftimit zyrtar, hetuesit po punojnë për identifikimin e adresave IP dhe të dhënave të tjera që mund të çojnë në identifikimin e personave që qëndrojnë pas faqeve dhe profileve ku janë publikuar ose shpërndarë materialet.

Policia ka nisur gjithashtu procedurat për heqjen e përmbajtjeve nga platformat ku ato vijojnë të jenë të aksesueshme.

“Drejtoria Vendore e Policisë Tiranë ka nisur hetimet kryesisht, pas konstatimit të publikimit dhe shpërndarjes në disa portale dhe platforma online të materialeve filmike me përmbajtje intime.

Sektori për Hetimin e Krimeve Kibernetike po kryen veprime hetimore me qëllim identifikimin e adresave IP, dhe të dhënave të tjera të faqeve dhe profileve që kanë publikuar apo shpërndarë këto materiale, si dhe po ndërmerr procedurat për heqjen e tyre nga platformat ku janë publikuar”, njofton Policia e Tiranës.

Materialet procedurale i janë referuar Prokurorisë për veprat penale “Përgjimi i paligjshëm i të dhënave kompjuterike”, “Ndërhyrja në të dhënat kompjuterike”, “Ndërhyrja e padrejtë në jetën private” dhe “Keqpërdorimi i pajisjeve”.

Hetimet vijojnë pas përhapjes së materialeve në rrjetet sociale, si dhe publikimit apo rishpërndarjes së tyre nga faqe dhe portale të ndryshme.

Më herët, edhe Zyra e Komisionerit për të Drejtën e Informimit dhe Mbrojtjen e të Dhënave Personale ka kërkuar ndërprerjen e publikimit dhe rishpërndarjes së materialeve intime, duke paralajmëruar për përgjegjësi administrative dhe penale.