Shpërthen analisti: Zgjedhja e kreut të SPAK, si në ‘Big Brother’!

Dje u zhvillua dëgjesa maratonë në KLP për zgjedhjen e kreut të ri të SPAK, që ‘vulosi’ Klodian Brahon si kryeprokuror i ri. Por për analistin Arjan Curri, e gjithë seanca e pyetjeve ishte nën nivelin minimal të pritshmërive.

Curri i cilësoi pyetjet e anëtarëve të KLP-së si “pyetje Big Brother-i”, duke thënë se i ngjanin më shumë një reality show sesa një procesi serioz për zgjedhjen e kreut të Prokurorisë së Posaçme.

“Pashë një Big Brother. Këto janë pyetje që konkurrentët e Big Brother i bëjnë njëri-tjetrit. Dikush i thoshte: ‘A do më ndihmosh po të kem ndonjë hall, të të kërkoj ndonjë nder?’ ‘Jo’, i thoshin këta, ‘jo’. Një tjetër i thoshte: ‘A do na japësh kafe apo kakao’. Këto janë skandale, është turp,” – tha Curri.

Sipas tij, niveli ishte aq i ulët sa edhe studentët e tij “do të vinin duart në kokë”.

“Aty duheshin pyetje të tipit ‘çfarë është prova’. Aty kishte furça njëri-tjetrit, përdorej termi ‘femër’. Ishin ku thërret qameti,” – u shpreh ai.

Në fund, Curri theksoi në “TopStory” se e vetmja që meritonte të paktën një votë, sipas tij, ishte kandidatja Doloreza Musabelliu:

“Zonjës Musabelliu duhet t’i jepej një votë.”