“Shqipëria e Re”, populli rikthehet në shesh në ditën e 11 të protestës

Protestat qytetare që prej 10 ditësh kanë dominuar jetën publike dhe politike në vend pritet të vijojnë edhe sot. Organizatorët kanë njoftuar se qytetarët do të mblidhen sërish në orën 18:00 përpara Kryeministrisë, në atë që konsiderohet dita e 11-të radhazi e mobilizimit qytetar.

Ajo që fillimisht nisi si një reagim kundër projekteve të ndërtimit në zonën e Zvërnecit është shndërruar gradualisht në një lëvizje më të gjerë proteste, ku pjesëmarrësit artikulojnë kërkesa që lidhen me qeverisjen, sistemin politik dhe reformimin e proceseve demokratike në vend.

Nën sloganin “Shqipëria e Re”, mijëra qytetarë u mblodhën edhe mbrëmjen e kaluar në qendër të Tiranës, duke shprehur pakënaqësinë ndaj qeverisë dhe duke kërkuar ndryshime politike. Gjatë protestës u dëgjuan thirrje dhe slogane të ndryshme që reflektonin qëndrimet e pjesëmarrësve ndaj klasës politike dhe zhvillimeve aktuale në vend.

Organizatorët pretendojnë se mbështetja qytetare për protestën po rritet nga dita në ditë, ndërsa pjesëmarrësit kërkojnë që zëri i tyre të dëgjohet dhe kërkesat e tyre të merren në konsideratë nga institucionet.

Një nga momentet kryesore të tubimit të mbrëmshëm ishte deklarata e aktivistit të lëvizjes qytetare, Edmond Gjata, i cili bëri të ditur se është dorëzuar në Komisionin Qendror të Zgjedhjeve një draft me propozime për ndryshime në Kodin Zgjedhor.

Sipas tij, ndryshimet e propozuara synojnë të krijojnë një sistem zgjedhor që garanton më shumë përfaqësim për qytetarët dhe më shumë mundësi për pjesëmarrje në proceset vendimmarrëse.

“Shqipëria e Re fillon nga zgjedhje të lira dhe të ndershme. Për 35 vite, zgjedhjet janë ndërtuar kryesisht mbi interesat e partive politike. Kodi i ri synon të vendosë në qendër qytetarët dhe interesat e tyre”, deklaroi Gjata para protestuesve.

Organizatorët kanë bërë thirrje për pjesëmarrje edhe në protestën e sotme, ndërsa mbetet për t’u parë se cili do të jetë reagimi i institucioneve dhe si do të evoluojë kjo lëvizje në ditët në vijim.