Shqipëria rreshtohet në krahun e SHBA-së dhe Izraelit, në luftën ndaj Iranit

Kryeministri Edi Rama ka reaguar lidhur me sulmet e ndërmarra nga Shtetet e Bashkuara të Amerikës dhe Izrael ndaj Iran, duke shprehur mbështetje për veprimin ushtarak dhe duke kërkuar që një nga strukturat kryesore të regjimit iranian të shpallet zyrtarisht organizatë terroriste.

Përmes një reagimi në rrjetet sociale, kreu i qeverisë shqiptare theksoi se Korpusi i Gardës Revolucionare Islamike duhet të trajtohet si organizatë terroriste dhe të përfshihet në listën ndërkombëtare të grupeve të tilla, njësoj siç kanë vepruar tashmë SHBA-ja dhe Kanada.

Rama nënvizoi se Shqipëria ka përjetuar drejtpërdrejt veprimtarinë armiqësore të regjimit në Teheran, duke iu referuar sulmeve kibernetike që kanë goditur institucionet shqiptare në vitet e fundit.

Ai shtoi se vendimi për ta shpallur Gardën Revolucionare organizatë terroriste lidhet jo vetëm me qëndrimin e Shqipërisë në krah të Izraelit dhe aleatëve të saj, por edhe me nevojën për të garantuar sigurinë kombëtare.

Kreu i qeverisë bëri të ditur gjithashtu se Tirana zyrtare do të ndërmarrë hapa për ta përfshirë këtë strukturë në listën e organizatave terroriste dhe u bëri thirrje vendeve të Bashkimi Evropian që të ndjekin të njëjtën qasje.

Në reagimin e tij, Rama theksoi gjithashtu mbështetjen për përpjekjet ndërkombëtare që synojnë të pengojnë regjimin iranian të sigurojë kapacitete bërthamore ose ushtarake që mund të përdoren kundër Izraelit apo vendeve të tjera në rajonin e Lindjes së Mesme.

Reagimi i plotë i Edi Ramës:

Ka ardhur koha të shkurtojmë fjalët dhe të shkojmë drejt thelbit.

Korpusi i Gardës Revolucionare Islamike është një organizatë terroriste dhe duhet të trajtohet si e tillë. Jo vetëm përmes sanksioneve ndaj Republikës Khomeiniste, por duke e quajtur zyrtarisht me emrin e saj të vërtetë dhe duke e listuar ndër organizatat terroriste, siç kanë bërë tashmë Shtetet e Bashkuara dhe Kanadaja.

Jo vetëm sepse qëndrojmë të palëkundur me Izraelin dhe me vendet arabe vëllazërore që kërkojnë paqe.

Jo vetëm sepse mbështesim Shtetet e Bashkuara në mbështetjen ushtarake të Izraelit sot, nën drejtimin e Presidentit Donald Trump.

Jo vetëm sepse Bashkimi Evropian, përmes Presidentes Ursula von der Leyen, ka nënvizuar edhe njëherë sot natyrën vrasëse të regjimit të Teheranit.

Por mbi të gjitha, në një ditë si kjo, kur kërkohen veprime, jo vetëm fjalë, në nder të viktimave të pafundme të pafajshme të gjakësorëve të Korpusit të Gardës Revolucionare Islamike.

Shqipëria ka përjetuar nga afër fytyrën barbare të regjimit të Teheranit përmes agresioneve kibernetike ndaj vendit tonë. Për ne, kjo nuk është gjeopolitikë abstrakte. Është siguri kombëtare, qartësi morale dhe ligjore.

Shqipëria do të veprojë në përputhje me këtë. Ne do ta quajmë Gardën Revolucionare atë që është dhe do ta listojmë ndër organizatat terroriste, dhe u bëjmë thirrje miqve tanë evropianë të bëjnë të njëjtën gjë.

Ne mbështesim plotësisht çdo përpjekje vendimtare për të parandaluar një herë e përgjithmonë që vrasësit në Teheran të fitojnë kapacitet bërthamor ose ushtarak për të dëmtuar Izraelin apo ndonjë vend tjetër që kërkon paqe në Lindjen e Mesme.

Terrorizmi duhet të quhet me emrin e vet. Dhe kur quhet me emrin e vet, ai duhet të ndalet.