SKEMA/ Berberi çoi listën e renditjes së kompanive, ministrja ndërhyri për ndryshimin e fituesit

Janë zbardhur detaje të reja nga dosja penale Nr.136, ku përveç zv/kryeministres së Shqipërisë, Belinda Balluku, si të pandehur janë marrë edhe pesë zyrtarë të tjerë të ministrisë: Evis Berberi, Gentian Gjyli, Erald Elezi, Jetmira Dervishi dhe Mirzeta Kashnica.

Sipas informacionit të siguruar, Balluku ka komunikuar direkt me Evis Berberin përmes një nga telefonat e sekuestruar, duke urdhëruar ndryshimin e listës së renditjes së fituesve të një tenderi. Urdhërat janë dhënë nga Balluku në telefon, ndërsa zyrtarët e tjerë, duke filluar nga ish-drejtori i ARRSH-së, Gentian Gjyli, Erald Elezi, Jetmira Dervishi dhe Mirzeta Kashnica, kanë zbatuar këto instruksione në mënyrë të koordinuar, deri në përfundimin e porosisë së dhënë nga zv/kryeministrja.

Nga mesazhet e sekuestruara të Berberit, Balluku njihet nga ai me përmbajtjen e një dokumenti të dërguar përmes aplikacionit “WhatsApp”, që tregonte renditjen e kompanive pjesëmarrëse në tenderin me vlerë 2 milionë euro, të hapur nga Ministria e Infrastrukturës, për supervizimin e punimeve në tunelin e Llogarasë.

Sapo u njoh me renditjen, Balluku filloi të shkëmbejë mesazhe me Berberin, duke e udhëzuar atë të anullojë praktikën e prokurimit dhe ta rihapë për të ndryshuar renditjen e kompanive fituese.

Megjithëse ligji ndalon titullarin e ministrisë të marrë pjesë në procedurat tenderuese, në praktikë Balluku ka vepruar në prapaskenë, duke urdhëruar vartësit e saj në ministri dhe në Autoritetin Rrugor Shqiptar të kryejnë çdo manovër të mundshme që favorizonte kompanitë “Net Group” dhe hollandezen “Hill International”.

Para shpalljes së fituesve, praktika e prokurimit është anulluar dy herë, ndërsa për herë të tretë tenderi u hap më 1 dhjetor 2021. Në mars 2022, ministria e drejtuar nga Balluku shpalli fituesit e kontratës me vlerë 196 milionë lekë, ose rreth 2 milionë euro.

Në tender morën pjesë bashkimi i kompanive “Stucky L.T.D” dhe “Gjeokonsult & CO” me pronar Xhevahir Mustafaj, të cilët garuan kundër “Hill International N.V”, pronë e një shtetasi hollandez me administrator grek, Ioannis Kirkinezis, dhe “Net-Group”, në pronësi të Valter Begajt, mik i ngushtë i Ervis Berberit.

Dyshimet për favorizim u shtuan kur kompanitë “Stucky L.T.D” dhe “Gjeokonsult & CO” u skualifikuan për mosplotësim të kushteve, duke i hapur rrugën “Hill International N.V” dhe “Net-Group”, që në mars 2022 shpalleshin fitues me ofertë 194 milionë lekë, për një kontratë me kohëzgjatje 34 muaj për mbikëqyrjen e punimeve në tunelin e Llogarasë.

Në kuadër të hetimeve, prokurori Dritan Prençi ka kërkuar në prill 2025 në ARRSH tërheqjen e dokumenteve të tenderit. Analiza e mesazheve telefonike midis Berberit dhe Ballukut ka treguar se fituesit janë paracaktuar dhe kompanitë e tjera janë skualifikuar qëllimisht, për shkak të lidhjeve personale mes Berberit, Ervis Lamës, mikut të tyre Valter Begaj dhe ministres së Infrastrukturës, Belinda Balluku.