S’ka më dyshime, zbulohet ku do luhet ‘Finalissima’ Spanjë-Argjentinë

Ndeshja mes kampionëve të Evropës, Kombëtarja e Spanjës, dhe fituesve të Kupës së Amerikës, Kombëtarja e Argjentinës, e njohur si Finalissima, rrezikon të ndryshojë vendzhvillim për shkak të tensioneve të fundit në Lindjen e Mesme.

Takimi ishte planifikuar për 27 mars në stadiumin Lusail Stadium në Doha, por situata e sigurisë në rajon e ka vënë seriozisht në pikëpyetje zhvillimin e ndeshjes në Katar. Sipas burimeve ndërkombëtare, Londra shihet aktualisht si alternativa më e mundshme për ta pritur përballjen.

Shoqata e Futbollit e Katarit ka pezulluar përkohësisht aktivitetet sportive, në një klimë pasigurie pas përshkallëzimit të konfliktit rajonal. Ndërkohë, Federata Spanjolle e Futbollit po kërkon një zgjidhje të shpejtë, duke e konsideruar pushimin ndërkombëtar të marsit vendimtar për përgatitjet para Kupës së Botës 2026.

Trajneri i Spanjës, Luis de la Fuente, konfirmoi se negociatat janë në zhvillim, duke theksuar se prioritet mbetet zhvillimi i ndeshjes brenda afateve të përcaktuara, edhe nëse duhet gjetur një stadium alternativ.

Një nga opsionet kryesore është Stadiumi Wembley, i cili priti edicionin e kaluar në vitin 2022, kur Argjentina mposhti Italinë. Megjithatë, stadiumi ka tashmë një ndeshje të programuar më 27 mars, çka mund të detyrojë organizatorët të shqyrtojnë impiante të tjera në kryeqytetin britanik.

Procesi i vendimmarrjes përfshin disa institucione ndërkombëtare, mes tyre UEFA, CONMEBOL, FIFA dhe Federatën Argjentinase të Futbollit. Madridi u propozua fillimisht si vend organizimi, por u refuzua nga pala argjentinase, e cila kërkon terren neutral.

Në skenë kanë hyrë edhe alternativa të tjera si Maroku dhe Miami. Ky i fundit u përmend për shkak të pranisë së Lionel Messi, i cili aktivizohet me Inter Miami, por kalendari i ngjeshur sportiv në SHBA e bën të ndërlikuar organizimin atje.

Për momentin, Londra mbetet opsioni më realist nëse Doha përjashtohet përfundimisht, ndërsa vendimi përfundimtar pritet të merret brenda afatit të caktuar nga palët organizatore.