Skandali ‘Balluku’, drejtori i KESH paraqitet në SPAK

Erald Elezi, drejtori i Drejtorisë së Planifikimit Strategjik dhe Operacioneve në Autoritetin Rrugor Shqiptar, është shoqëruar sot në SPAK nga policia. Ai ndodhet aktualisht në arrest shtëpie, vendim ky i dhënë nga GJKKO, në kuadër të hetimeve për skandalin e njohur si “Balluku”.

Në këtë hetim janë të përfshirë edhe Belinda Balluku dhe Evis Berberi, të cilët akuzohen për shkelje të barazisë në tendera. SPAK sqaron se procedurat e dyshimta lidhen me prokurimet për Unazën e Madhe dhe tunelin e Llogarasë.

Sipas hetimeve, Balluku në bashkëpunim me anëtarët e Komisionit të Vlerësimit të Ofertave, përfshirë Evis Berberin, Erald Elezin, Gentian Gjylin, Jetmira Dervishin dhe Mirzeta Kashnicën, dyshohet se kanë paracaktuar fituesit e procedurave të prokurimit dhe kanë krijuar avantazhe të padrejta për operatorët ekonomikë.

Një nga rastet më të mëdha është tenderi për ndërtimin e Lotit 4 të Unazës së Madhe të Tiranës, me fond limit rreth 2.1 miliardë lekë pa TVSH (rreth 20 milionë euro). Hetimet tregojnë se kriteret e këtij tenderi janë vendosur në mënyrë që të favorizojnë kompanitë Euroteorema, Pevlaku dhe NOVA Construction.

SPAK nënvizon se veprimet e dyshuara shkelin ligjin për prokurimin publik nr. 162/2020, VKM nr. 285/2021, si dhe ligjin për parandalimin e konfliktit të interesave nr. 9367/2005. Përmes këtyre veprimeve, sipas Prokurorisë, është krijuar një avantazh i padrejtë për bashkimin e operatorëve ekonomikë të përmendur më sipër, duke cenuar parimin e barazisë në tendera.

Hetimet vijojnë, ndërsa SPAK ka ngritur akuza të reja për shkelje të barazisë në tendera ndaj Ballukut dhe vartësve të saj për rastin e Lotit 4 të Unazës së Madhe. Investigimet përfshijnë edhe komunikimet e brendshme të ministrit dhe të punonjësve të saj, të cilat sipas SPAK, kanë ndihmuar në dokumentimin e paracaktimit të fituesve.