Sot 8 dhjetori, Dita Kombëtare e Rinisë

Sot shënohet 8 Dhjetori, Dita Kombëtare e Rinisë. një datë që prej vitit 2009 nderohet si simbol i kurajos dhe rolit historik të studentëve shqiptarë. Në këtë ditë përkujtohet brezi që në dhjetor të vitit 1990 ndezi shkëndijën e ndryshimit dhe i hapi vendit rrugën drejt demokracisë.

Më 8 dhjetor 1990, studentë dhe pedagogë të Universiteteve të Tiranës dolën në protestë paqësore, duke marrë përsipër një akt që shënoi kthesën më të madhe politike e shoqërore në Shqipëri. Me thirrjen e tyre të famshme “E duam Shqipërinë si gjithë Evropa”, ata artikuluan për herë të parë publikisht aspiratën për integrim, pluralizëm politik dhe vendosjen e vlerave perëndimore në një shtet të së drejtës.

Lëvizja e atij dhjetori mbetet e vetmja lëvizje paqësore që përmbysi një sistem të tërë politik në Shqipëri. Guximi i tyre i vuri pikë epokës së izolimit dhe kontrollit ideologjik, duke i hapur vendit perspektivën e ekonomisë së tregut dhe një shoqërie të hapur.

Ndryshe nga shumë ngjarje të tjera historike, 8 Dhjetori nuk pati palë fituese apo humbëse: ishte një moment i përbashkët, një hap drejt së ardhmes që sot konsiderohet gjithnjë e më shumë si një vlerë kombëtare.