PD sinjalizon vijimin e bojkotit

E hëna shënon përfundimin e afatit të vendosur nga mazhoranca për opozitën, që t’i japë fund bojkotit disa javor dhe të rikthehet në punimet e Komisionit për Reformën Territoriale.

Mospjesëmarrja e Partisë Demokratike rrezikon të shembë konsensusin e deritanishëm në këtë strukturë, duke i hapur rrugë Partisë Socialiste të marrë shumicën e anëtarëve, si edhe drejtimin e komisionit. Në këtë skenar, opozita mbetet pa të drejtë vote dhe jashtë procesit vendimmarrës.

Burime politike bëjnë me dije se gjasat janë që demokratët të mos marrin pjesë as sot në mbledhjen e Komisionit. Më 30 janar, kreu i PD-së, Sali Berisha, konfirmoi vijimin e bojkotit, duke deklaruar se nuk do të ketë bashkëpunim me mazhorancën për sa kohë, sipas tij, po bllokohet drejtësia në çështjen “Balluku”.

Ndërkohë, Kuvendi ka përfshirë në rendin e ditës së seancës plenare të së martës ndryshimin e përbërjes së Komisionit për Reformën Territoriale. Propozimi parashikon heqjen e barazisë numerike mes palëve dhe eliminimin e bashkëkryesimit të opozitës.

Paralelisht me mbledhjen e Komisionit, në të njëjtën orë, grupi parlamentar i Partisë Demokratike do të zhvillojë një takim në selinë blu, ku pritet të diskutohet qëndrimi që opozita do të mbajë në seancën plenare të së martës.