SPAK gati kërkesën për arrestim, Balluku “ndez” motorët në Fier

Ndërsa hetimet nga SPAK vijojnë dhe pas refuzimit të parë të Kuvendit për heqjen e imunitetit të saj, burime pranë hetimit bëjnë me dije se oficerët e Byroja Kombëtare e Hetimit dhe prokurorët janë duke përgatitur një kërkesë të dytë për autorizim arresti, këtë herë mbi dyshime për përfshirje në “grup të strukturuar kriminal”.

Në të njëjtën kohë, ish-zëvendëskryeministrja ka dalë publikisht në terren politik. Një ditë më parë ajo është shfaqur në qarkun e Fierit, ku ka nisur organizimin elektoral, duke sinjalizuar aktivizim të plotë në fushatë.

Në një mesazh publik, Balluku deklaron se po “forcon organizimin” dhe po “zgjeron familjen socialiste”, duke u shprehur e gatshme për betejën e radhës elektorale dhe duke ftuar qytetarët t’i bashkohen strukturave të partisë.

Situata krijon një kontrast të fortë politik dhe institucional: nga njëra anë hetimet e thelluara të drejtësisë dhe përgatitja e një kërkese të re për imunitetin, dhe nga ana tjetër një profil aktiv në terren, me mbështetje të hapur politike nga mazhoranca.

Kujtohet se Kuvendi rrëzoi më herët kërkesën e SPAK për arrestimin e saj, duke i lënë hapësirë vijimit të hetimeve pa masë sigurie më të ashpër  . Ndërkohë, ajo mbetet nën masa kufizuese si ndalimi i daljes jashtë vendit dhe pezullimi nga funksionet ekzekutive  .