SPAK kërkon rikthimin në qeli të ish-kryebashkiakut të Himarës

Ish-kryebashkiaku i Himarës, Jorgo Goro, pritet të rikthehet në qeli rreth shtatë muaj pas lirimit, pas përllogaritjeve të fundit të bëra nga SPAK mbi kohën e mbetur të dënimit.

Sipas burimeve, pas vendimit të Gjykatës së Apelit që e dënoi me 2 vite burg, dënim i reduktuar në 1 vit e 4 muaj për shkak të gjykimit të shkurtuar, SPAK ka përllogaritur edhe periudhën e paraburgimit. Nga kjo rezulton se Goro duhet të vuajë edhe 6 muaj e 10 ditë burg.

Urdhri i ekzekutimit është firmosur nga prokurori Elvin Gokaj, por deri më tani nuk është zbatuar nga Policia e Shtetit.

Ndërkohë, mbrojtja ka reaguar menjëherë. Avokatët e Goros kanë depozituar një kërkesë për revokimin e këtij urdhri, duke pretenduar se dënimi është shlyer përmes kohës së kaluar në paraburgim.

Çështja mbetet e hapur dhe pritet një vendimmarrje mbi kërkesën e mbrojtjes, e cila do të përcaktojë nëse ish-zyrtari do të rikthehet në qeli apo jo.