Deklarata skandaloze: Ishte përdorues heroine dhe i prekur nga HIV

Spitali Rajonal i Durrësit është vënë në qendër të kritikave pas një reagimi zyrtar, në të cilin u bënë publike informacione tepër sensitive mbi gjendjen shëndetësore të një pacienti, në përpjekje për të përgënjeshtruar raportimet mediatike lidhur me rastin e tij.

Pak ditë më parë, disa media raportuan se shtetasi A.A., 52 vjeç, kishte humbur jetën pasi ishte nxjerrë nga spitali dhe ishte lënë jashtë ambienteve të tij. Në reagimin zyrtar, Spitali Rajonal i Durrësit sqaroi se pacienti është gjallë, ndodhet në repartin e Terapisë Intensive dhe i është nënshtruar me sukses një ndërhyrjeje të dytë kirurgjikale.

Megjithatë, reagimi institucional ka hapur një debat të fortë mbi mënyrën e komunikimit të spitalit. Në deklaratë u publikuan të dhëna personale dhe shëndetësore të pacientit, duke u bërë të ditur diagnoza dhe elementë të historikut të tij mjekësor, përfshirë statusin e tij shëndetësor, trajtimet që kishte ndjekur dhe pretendime mbi përdorimin e lëndëve narkotike.

Këto janë informacione që konsiderohen pjesë e sekretit mjekësor dhe mbrohen nga legjislacioni për mbrojtjen e të dhënave personale dhe nga parimet e etikës profesionale në marrëdhënien mes mjekut dhe pacientit.

Debati nuk lidhet me përgënjeshtrimin e lajmit mbi gjendjen e pacientit, por me faktin nëse publikimi i këtyre të dhënave ishte i nevojshëm dhe proporcional për të sqaruar opinionin publik.

Ekspertë të etikës mjekësore kanë theksuar vazhdimisht se konfidencialiteti i pacientit është një nga shtyllat themelore të profesionit të mjekut dhe nuk mund të cenohet për qëllime komunikimi publik, pavarësisht rrethanave.

Rasti ngre pikëpyetje mbi respektimin e standardeve profesionale dhe ligjore nga një institucion publik shëndetësor, si dhe mbi nevojën për një vlerësim nga autoritetet përgjegjëse nëse janë respektuar detyrimet që lidhen me ruajtjen e sekretit mjekësor dhe mbrojtjen e të drejtave të pacientit.