Tërmeti 6.1 ballë ‘shkund’ Turqinë (VIDEO)

Një tërmet me magnitudë 6.1 ballë ka tronditur mbrëmjen e së hënës rajonin Sındırgı në provincën Balıkesir, në veriperëndim të Turqisë. Lëkundjet janë regjistruar rreth orës 22:49 sipas orës lokale dhe janë ndjerë gjerësisht në disa qytete të mëdha, përfshirë Izmirin, Bursën, Stambollin dhe Tekirdağun.

Sipas të dhënave të Agjencisë për Menaxhimin e Fatkeqësive dhe Emergjencave (AFAD), epiqendra e tërmetit ndodhej në një thellësi prej vetëm 6 kilometrash, çka e bën atë një tërmet të cekët dhe shpjegon përhapjen e gjerë të lëkundjeve.

Raportohet se në Sındırgı janë shembur disa ndërtesa, ndërsa forcat e shpëtimit dhe zjarrfikësit janë angazhuar në terren për të vlerësuar dëmet dhe për të kërkuar persona të mundshëm nën rrënoja.

Autoritetet u kanë bërë thirrje qytetarëve të qëndrojnë larg ndërtesave të dëmtuara dhe të përdorin komunikimet online për të shmangur mbingarkesën e rrjeteve telefonike. Ndërkohë, ekipet e emergjencës po kryejnë vlerësimin e dëmeve materiale në zonat më të prekura.

Në 80 ditët e fundit, në të njëjtin rajon janë regjistruar rreth 12 mijë lëkundje, përfshirë 45 tërmete me magnitudë nga 4 deri në 5 ballë. Kujtohet se në gusht të këtij viti, një tjetër tërmet me të njëjtën magnitudë kishte shkaktuar vdekjen e një personi të moshuar dhe shembjen e disa ndërtesave të vjetra.