Terror në TikTok/ Tre vajza të reja torturohen dhe vriten nga karteli i drogës në Argjentinë

Tre vajza të reja janë bërë viktima të një vrasjeje brutale nga një bandë narkotrafikantësh në Argjentinë, pas një rrëmbimi dhe torturash të tmerrshme. Një pjesë e dhunës është transmetuar edhe drejtpërdrejt në TikTok, duke tronditur opinionin publik.

Autoritetet e kanë cilësuar ngjarjen si një akt hakmarrjeje të organizuar nga grupi kriminal, i cili mashtroi viktimat duke i ftuar në një “event” për t’i çuar më pas në një vend ku do të ekzekutoheshin.

Viktimat:

-Lara Gutierrez, 15 vjeç

-Brenda del Castillo, 20 vjeç

-Morena Verdi, 21 vjeç

Hetimet tregojnë se dy prej vajzave dyshohet të kenë vjedhur katër kilogramë kokainë nga grupi, gjë që besohet se nxiti hakmarrjen e përgjakshme.

Nga vendi i ngjarjes janë zbuluar detaje makabre: Lara kishte humbur të gjitha gishtat e dorës së majtë, Brenda kishte plagë të rënda në kokë dhe bark, ndërsa Morena ishte asfiksuar me një qese plastike. Trupat u gjetën të groposur në një kopsht pesë ditë pas zhdukjes.

Ministri i Sigurisë së Buenos Aires, Javier Alonso, deklaroi: “Vajzat menduan se po shkonin në një event, por ranë në kurthin e një bande ndërkombëtare të trafikut të drogës, e cila planifikoi vrasjen e tyre.”

Udhëheqësi i bandës është shtetas peruan dhe besohet se ka ikur nga vendi, ndërsa katër persona të tjerë janë arrestuar në lidhje me ngjarjen.