Toka do humbasë gravitetin më 12 gusht? NASA zbulon të vërtetën

NASA ka reaguar zyrtarisht ndaj një teorie konspirative që u përhap me shpejtësi në internet, sipas së cilës Toka do të humbiste gravitetin për shtatë sekonda më 12 gusht 2026, duke shkaktuar pasoja katastrofike dhe miliona viktima në mbarë botën.

Sipas këtyre pretendimeve të pabazuara, mungesa e përkohshme e gravitetit do të bënte që njerëzit, ndërtesat dhe objektet e tjera të ngriheshin në ajër dhe më pas të përplaseshin dhunshëm në momentin e rikthimit të tij. Teoria konspirative fliste për deri në 40 milionë viktima dhe pretendonte se NASA kishte nisur një program sekret të quajtur “Project Anchor”, për të menaxhuar pasojat e kësaj “katastrofe globale”.

Mohim kategorik nga NASA

Një zëdhënës i NASA-s, në një deklaratë për faqen e verifikimit të fakteve Snopes, i ka mohuar kategorikisht këto pretendime, duke theksuar se Toka nuk do të humbasë gravitetin as më 12 gusht 2026 dhe as në asnjë moment tjetër.

Sipas shpjegimit shkencor të agjencisë hapësinore amerikane, graviteti i Tokës varet drejtpërdrejt nga masa e saj totale. Që graviteti të “zhdukej”, planeti do të duhej të humbiste në mënyrë masive materien e tij — bërthamën, mantelin, koren, oqeanet, ujin dhe atmosferën — një skenar që nuk lidhet me asnjë fenomen natyror apo proces të njohur nga shkenca moderne.

Çfarë ndodh realisht më 12 gusht 2026?

Data e përmendur në teorinë virale nuk ka asnjë lidhje me ndonjë anomali gravitacionale. Ajo përkon me një eklips total diellor, i parashikuar për 12 gusht 2026, një fenomen astronomik i zakonshëm, i studiuar dhe i parashikueshëm me saktësi shkencore.

NASA sqaron se, ndonëse Dielli dhe Hëna ndikojnë në baticat dhe zbaticat përmes tërheqjes gravitacionale, këto procese nuk ndryshojnë gravitetin e përgjithshëm të Tokës. Fenomene të tilla janë plotësisht të kuptuara nga shkenca dhe nuk përbëjnë asnjë rrezik për jetën në planet.