Tri vrasje brenda ditës, por “rreziku më i madh” mbetet skuterët

E marta në Shqipëri nisi “qetësisht”, me patrulla policie që masnin shpejtësinë e monopatinave dhe skutereve elektrike nëpër rrugë sepse, siç dihet, rreziku më i madh për jetën publike janë djemtë e vajzat që shkojnë në punë me bateri, jo ata që dalin me thikë.

Por ndërsa monopatinat po ndaloheshin me krenari institucionale, në Durrës, një 25-vjeçar vrau babain e tij me thikën e bukës. Ngjarja ndodhi në Shkallnur, ku viktima 69-vjeçare ndërroi jetë gjatë rrugës për në spital. Autori, me probleme të shëndetit mendor, u kap dy orë më vonë.

Në Tiranë, ndërkohë, një debat në një lokal në zonën e Komunës së Parisit përfundoi me një tjetër tragjedi: picieri Filip Shehu goditi për vdekje kolegun e tij, kuzhinierin Indrit Ismaillari. Tre plagë me thikë, një jetë e shuar dhe një qytet që vazhdon rutinën, sepse “në fokus janë monopatinat”.

Dhe si për ta përmbyllur “ditën normale”, edhe Berati nuk mbeti pas. Pranë kalasë, 63-vjeçari Kristo Mema, me precedentë për vrasje në Greqi, goditi për vdekje një 42-vjeçar pas një zënke për… kalin. Po, për kalin. Autori u largua dhe është ende në kërkim.

Tre qytete, tre viktima, tre histori që do të harrohen brenda 24 orëve. Por mos u shqetësoni: monopatinat janë në rrugën drejt zhdukjes. Rrugët janë më të sigurta për aq kohë sa nuk ecën as me rrota, as me kuaj, dhe ndoshta as me shpresë.