“Tu q** ropt”, Berisha nxjerr pjesë nga dosja e hakerimit të SPAK

Kryetari i Partisë Demokratike, Sali Berisha, ka publikuar ditën e sotme pjesë nga dosja hetimore që lidhet me hakerimin e sistemit informatik të Prokurorisë së Posaçme (SPAK).

Në dokumentet e bëra publike nga Berisha, përfshihen komunikime mes dy të pandehurve, Arnold Rrokaj dhe Zambak Gjoni, të cilët rezultojnë se kanë komunikuar me njëri-tjetrin lidhur me ndërhyrjen në sistemet e SPAK.

Sipas pjesës së dosjes të publikuar nga Berisha, më datë 12 shkurt 2025, në orën 21:17, Arnold Rrokaj i dërgon Zambak Gjonit një foto që duket si faqe interneti, nga e cila mund të aksesohen sistemet e SPAK. Më pas, ai i dërgon një SMS me përmbajtjen:

“A mos e hapsha dot“.

Në vijim, Arnold Rrokaj i dërgon sërish një SMS Zambak Gjonit, ku thuhet:

“Se do i shkruaj Ramës… hajt tu qim ropt”.

Sipas dosjes hetimore, nga përmbajtja e këtij komunikimi krijohet bindja e arsyeshme se veprimet e të hetuarit kanë të bëjnë me ndërhyrje të paautorizuar në sistemet e SPAK, me qëllim dëmtimin e tyre përmes shpërndarjes së dokumenteve te persona të tretë.

Më tej, në datën 21 shkurt, i hetuari Zambak Gjoni kërkon informacion edhe për arrestimin e shtetasit Engjëll Agaçi, ndërsa Arnold Rrokaj shprehet:

“Ja ta shikoj njëherë. Po ç’rëndësi ka kush prokuror e ka. Nga këta që kam unë, s’e ka njeri.”

Në deklaratën e tij publike, Sali Berisha theksoi se kjo dosje, sipas tij, dëshmon se kryeministri Edi Rama është autori i vërtetë që ka organizuar dhe urdhëruar hakerimin e dosjeve në SPAK.

Hetimet për këtë çështje vijojnë, ndërsa të gjithë personat e përfshirë gëzojnë prezumimin e pafajësisë deri në një vendim përfundimtar të gjykatës.