Veliaj del nga qelia, të premten vendoset fati i zgjedhjeve në Tiranë

Ditën e premte pritet të vuloset fati i zgjedhjeve në Tiranë. Gjykata Kushtetuese ka caktuar datën 31 tetor për shqyrtimin e ankesës së Erion Veliajt, i cili ka kundërshtuar vendimin për shkarkimin nga posti i kryebashkiakut.

Seanca do të jetë vendimtare, pasi Kushtetuesja ka pezulluar përkohësisht mbajtjen e zgjedhjeve të reja në kryeqytet. Të premten do të dëgjohen palët dhe pritet që të ketë një vendim paraprak mbi fatin e procesit.

Nëse gjykata lë në fuqi shkarkimin e Veliajt, do të zhvillohen zgjedhje të reja për Bashkinë e Tiranës. Por nëse vendimi i qeverisë rrëzohet, atëherë Veliaj do të mbetet në detyrë deri në vitin 2027.

Burime bëjnë me dije se në seancë do të jetë i pranishëm edhe vetë Erion Veliaj, i cili për herë të parë do të dalë nga qelia, pasi Drejtoria e Burgjeve ka marrë masat për transportimin e tij në Gjykatën Kushtetuese.