VIDEO/ Ekzekutohet në mes të rrugës gazetari i njohur

Gazetari Fernando Nunez, drejtori i faqes së lajmeve Kamila TV, u vra të shtunën ndërsa kthehej nga raportimi në departamentin verior të La Libertad, njoftoi të dielën Shoqata Kombëtare e Gazetarëve të Perusë (ANP).

Sulmi ndodhi ndërsa Nunez po udhëtonte me motoçikletë së bashku me vëllain e tij në rajonin e Guadalupe. Gazetari vdiq në vend, ndërsa vëllai i tij u dërgua në spital në gjendje kritike.

Kjo është vrasja e tretë e një gazetari në Peru gjatë këtij viti, një tregues i rritjes së dhunës ndaj profesionistëve të medias. ANP i ka bërë thirrje autoriteteve të kryejnë një hetim të menjëhershëm, duke marrë parasysh mundësinë që motivi i krimit të lidhet me punën gazetareske të Nunez.

“Ngjarja e fundit tregon përshkallëzimin e padurueshëm të dhunës kundër atyre që ushtrojnë funksionin e informacionit,” deklaroi ANP në një njoftim zyrtar.

Sipas statistikave zyrtare, nga janari deri në tetor të këtij viti në Peru u regjistruan 1,888 vrasje, një rritje prej 13% krahasuar me të njëjtën periudhë të vitit 2024. Vetëm në departamentin e La Libertad u regjistruan 236 vrasje gjatë kësaj periudhe.

Situata e sigurisë në vend ka qenë një problem i madh politik dhe shoqëror. Në tetor, ish-presidentja Dina Boluarte u shkarkua nga Kongresi për “paaftësi morale të përhershme” në adresimin e krizës së sigurisë, dhe Presidenti i parlamentit, José Gerry, mori detyrën si president i përkohshëm deri në zgjedhjet e vitit 2026.