Video: Jam “këshilltare” e Edi Ramës paguani lekët

VIDEO/ Premtonte apartamente me emrin e Ramës, arrestohet 45-vjeçarja; u merrte nga 2 milionë lekë familjeve të tërmetit

Një 45-vjeçare është arrestuar nga Policia e Tiranës, pasi dyshohet se u merrte shuma të konsiderueshme parash familjeve të prekura nga tërmeti i vitit 2019, duke u premtuar se do t’i ndihmonte të përfitonin apartamente të reja ose dëmshpërblime.

E arrestuara është Ina Cakaj, e cila dyshohet se paraqitej si person me lidhje dhe ndikim në administratën shtetërore, duke krijuar te qytetarët bindjen se mund të ndërhynte në procedurat e rindërtimit.

Në një video-regjistrim Cakaj shfaqet përpara disa banorëve në Fushë-Krujë, ku prezantohet si “këshilltare” e një projekti që, sipas pretendimit të saj, ishte ngritur nga kryeministri Edi Rama për familjet që prisnin të merrnin apartamentet e premtuara pas tërmetit.

Në video, 45-vjeçarja dëgjohet duke u thënë banorëve se, nëse paguanin dy milionë lekë dhe dorëzonin dokumentet e kërkuara, brenda 24 orëve do të merrnin një mesazh nga Këshilli i Ministrave për miratimin e dhënies së çelësave të apartamenteve.

Ajo pretendonte se kishte për detyrë të gjente 20 familje në zonën e Fushë-Krujës, të cilat do të përfitonin nga një projekt që e prezantonte me emrin “La Mama”.

Sipas hetimeve të Policisë, këto pretendime dyshohet se ishin pjesë e një skeme mashtrimi. Cakaj dyshohet se shfrytëzonte pritjen e gjatë dhe nevojën e familjeve të dëmtuara nga tërmeti, duke u premtuar ndërhyrje në institucionet shtetërore kundrejt pagesave.

Policia po vijon hetimet për identifikimin e të gjithë qytetarëve të dëmtuar, shumën e përfituar dhe personat e tjerë që mund të jenë përfshirë në skemë.