Vllaznia tërhiqet nga kampionati? Presidenti merr vendimin drastik

Një situatë e krijuar ditën e sotme në Shkodër solli fillimisht raportime se Vllaznia e femrave do të tërhiqej nga kampionati, por ky informacion rezultoi i pasaktë.

Presidenti i klubit, Lazër Matija, ka konfirmuar se vendimi i tij lidhet me largimin personal nga drejtimi, ndërsa skuadra e vajzave do të vijojë normalisht aktivitetin dhe pjesëmarrjen në kampionat.

Në një konferencë për shtyp, Matija shpjegoi arsyet që e kanë çuar drejt këtij vendimi, duke e lidhur atë edhe me zhvillimet e fundit në futbollin shqiptar dhe me debatet që kanë pasuar deklaratat e tij publike.

“Prononcimi im u mor për keq”

Matija tha se një prej faktorëve që ndikoi në situatën e krijuar ishte mënyra se si u interpretua prononcimi i tij pas ndeshjes së Vllaznisë së meshkujve në Elbasan.

“Duke marrë shkas nga ngjarjet e fundit, edhe nga ndeshja e djemve në Elbasan, është marrë për keq prononcimi im për atë që ndodhi atje, sikur unë jam kundër strategjisë së FSHF-së. Por nuk është e vërtetë”, deklaroi ai.

Sipas Matijës, pozicioni i tij në drejtimin e futbollit të femrave ka qenë gjithmonë i lidhur me interesin e klubit dhe të qytetit të Shkodrës.

Ai theksoi se përpara se të mbante detyrën e kryetarit të shoqatës rajonale, ka qenë president i Vllaznisë së femrave.

“Mund të kërkoj edhe votëbesimin, jam i bindur që e marr 100%”

Presidenti i Vllaznisë së femrave u shpreh se largimi nga detyra, nga njëra anë, është një lehtësim personal, por nga ana tjetër e konsideron të rëndësishme që në drejtim të jetë një figurë që mund të punojë sipas kërkesave dhe strategjisë së federatës.

Matija tha se, nëse do të ishte e nevojshme, mund të kërkonte edhe zgjedhje dhe votëbesim nga shoqata.

“Duke menduar shumë gjëra, unë mund të kërkoj edhe zgjedhje, edhe votëbesimin e shoqatës dhe jam i bindur që e marr 100%. E kam bërë për t’i shërbyer qytetit. Nuk e kam bërë për një rrogë, por për të kontribuar deri në momentin e zgjedhjeve dhe që të jetë një person që të punojë edhe më mirë se unë”, u shpreh ai.

Matija nënvizoi gjithashtu eksperiencën e gjatë në futboll, duke deklaruar se prej rreth 30 vitesh ka qenë i përfshirë në drejtimin dhe zhvillimin e këtij sporti në Shkodër.

“Ka disa kohë që jam prononcuar për disa gjëra në futbollin shqiptar. Nuk jam tranzit në futboll. Kam 30 vjet në krye këtu duke kontribuar, i kam shërbyer këtij sporti”, tha ai.

Kritikat për “Final Four” dhe futbollin e femrave

Në fjalën e tij, Matija rikujtoi edhe disa prej qëndrimeve kritike që ka mbajtur ndër vite ndaj vendimeve dhe strategjive në futbollin shqiptar.

Ai përmendi debatet rreth formatit “Final Four”, të cilin e konsideroi një dështim, si dhe kundërshtimet e tij lidhur me përzgjedhjen e figurave që duhet të përfaqësojnë futbollin e femrave.

Matija tha se ka kundërshtuar gjithashtu idenë për shkrirjen e klubeve të futbollit të femrave dhe pretendoi se futbolli i vajzave në Shkodër është përballur prej kohësh me probleme.

Sipas tij, ka pasur raste kur futbolliste të Vllaznisë janë grumbulluar me Kombëtaren, por më pas janë lënë në stol.

Ai foli edhe për debatet lidhur me arbitrimin në futbollin e femrave, duke pretenduar se në të kaluarën është tentuar edhe të hiqet kampionati.

“Kam pasur debate për arbitrimin në futbollin e vajzave. Kanë dashur të na heqin kampionatin, por nuk ia kanë dalë falë punës dhe sakrificës”, deklaroi Matija.

“Do të ketë shkodranë të ndershëm që do ta çojnë Vllazninë më lart”

Në fund, Matija dha një mesazh të qartë për të ardhmen e klubit, duke theksuar se largimi i tij nga posti nuk nënkupton largimin e Vllaznisë nga futbolli.

Ai u shpreh se drejtimin e klubit duhet ta marrin persona nga Shkodra që e duan skuadrën dhe janë të gatshëm të kontribuojnë për zhvillimin e saj.

“Do të ketë shkodranë të ndershëm që e duan Vllazninë dhe do ta çojnë edhe më lart. Kemi shumë gjëra për të thënë, por për momentin janë të mjaftueshme”, tha ai.

Matija shtoi se deklaratat e tij mund të interpretohen në mënyra të ndryshme, por sipas tij nuk mund të luftohet një person vetëm sepse është kritik dhe shpreh publikisht qëndrimet e tij.

“Pse tërhiqem unë, Vllaznia do të jetojë!”, përfundoi Lazër Matija.

Pra, Vllaznia e femrave nuk është tërhequr nga kampionati. Vendimi i konfirmuar është dorëheqja e Lazër Matijës nga drejtimi, ndërsa skuadra do të vijojë normalisht aktivitetin sportiv.