Vlora Hyseni apelon masën e sigurisë në Apelin e Posaçëm

Ish-drejtoresha e Shërbimit Informativ të Shtetit, Vlora Hyseni, ka kundërshtuar në Gjykatën e Posaçme të Apelit masën e sigurisë “arrest në shtëpi” të vendosur ndaj saj.

Kërkesa për ndryshimin e masës është depozituar ditën e sotme nga avokati i Hysenit, i cili ka kërkuar heqjen e menjëhershme të masës së sigurisë të caktuar nga Gjykata e Posaçme e Shkallës së Parë për Korrupsionin dhe Krimin e Organizuar.

Sipas pretendimeve të mbrojtjes, nuk plotësohet asnjë nga kushtet ligjore që do të justifikonte vijimin e masës “arrest në shtëpi” ndaj ish-drejtoreshës së SHISH. Për këtë arsye, mbrojtja kërkon që vendimi i shkallës së parë të ndryshohet nga Apeli i Posaçëm.

Vlora Hyseni është nën hetim nga Prokuroria e Posaçme (SPAK), në kuadër të një procedimi ku ndaj saj janë ngritur dyshime për veprat penale “Përkrahja e autorit të krimit” dhe “Zbulimi i akteve ose të dhënave sekrete”.

Tashmë pritet shqyrtimi i ankimit nga Gjykata e Posaçme e Apelit, e cila do të vendosë nëse masa e sigurisë ndaj Hysenit do të mbetet në fuqi apo do të ndryshohet.