Vodhi 200 mijë litra naftë, esktradohet nga Spanja 31-vjeçari

Një operacion ndërkombëtar çoi në Shqipëri 31-vjeçarin J.K, i shpallur në kërkim, i akuzuar për vjedhje masive nafte dhe korrupsion të punonjësve të policisë.

Gjykata e Krimeve të Rënda kishte urdhëruar arrest në burg, ndërsa dosja e tij përfshin kontrabandë dhe vjedhje në bashkëpunim.

Njoftimi: 

Interpol Tirana/Vijon operacioni policor ndërkombëtar, i koduar “The Wanted”.

Akuzohet nga SPAK, se në muajin shkurt, 2025, korruptoi punonjësit e Policisë dhe vodhi, në bashkëpunim me shtetas të tjerë, 200 000 litra naftë nga një anije e ankoruar në portin e Durrësit, ekstradohet nga Spanja, 31-vjeçari.

Si rezultat i koordinimit të veprimeve operacionale, ndërmjet specialistëve të Interpol Tiranës dhe homologëve të Interpol Madridit, u finalizua në kuadër të operacionit “The Wanted”, procedura për ekstradimin nga Spanja, në Shqipëri, të shtetasit shqiptar, të shpallur në kërkim ndërkombëtar, J. K., 31 vjeç.

Në muajin shkurt, 2025, GjKKO i ka caktuar masën e sigurisë “Arrest në burg”, për veprat penale “Korrupsioni aktiv i personave që ushtrojnë funksione publike”, “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës” dhe “Vjedhja”, kryer në bashkëpunim.