“Vodhi” dokumentin sekret, Etika merr vendimin për Agron Shehajn

Kreu i Partisë Mundësia, njëherësh deputet në Kuvend, Agron Shehaj, është ndëshkuar me pezullim 60-ditor nga aktiviteti parlamentar. Vendimi është marrë nga Sekretariati për Procedurat, Votimet dhe Etikën, duke e përjashtuar atë përkohësisht nga seancat plenare dhe mbledhjet e komisioneve.

Masa disiplinore erdhi pas një kërkese të Partisë Socialiste, e cila e konsideron sjelljen e deputetit si shkelje të rëndë gjatë një episodi të ndodhur në ambientet e Kuvendit. Ngjarja lidhet me shqyrtimin e marrëveshjes për huanë direkte mes Shqipërisë dhe Shteteve të Bashkuara të Amerikës, në kuadër të financimit ushtarak nga jashtë.

Sipas pretendimeve të shumicës, dokumenti i diskutuar përmbante informacion të klasifikuar dhe mund të aksesohej vetëm në kushte të përcaktuara, pasi deputetët të kishin firmosur deklaratat përkatëse të konfidencialitetit. Në këtë kontekst, thuhet se Shehaj ka tentuar të marrë me vete një kopje fizike të materialit, gjë që është kundërshtuar nga administrata e Kuvendit.

Raportimet zyrtare pretendojnë se, pavarësisht refuzimit, deputeti e ka marrë dokumentin dhe është larguar, duke krijuar një situatë tensioni. Në përpjekje për të rikuperuar materialin, një këshilltare e Kuvendit ka ndjekur Shehajn, por gjatë kësaj ndërhyrjeje ka pësuar një rrëzim në shkallë, duke marrë dëmtime.

Në argumentimin e tyre, socialistët e cilësojnë sjelljen e deputetit si të papërshtatshme dhe të rrezikshme, duke theksuar se veprimet e tij kanë vënë në rrezik stafin administrativ dhe kanë cenuar rregullat e funksionimit institucional.

Përtej masës disiplinore, Partia Socialiste ka kërkuar që çështja të referohet për hetim edhe në Prokurorinë e Posaçme. Sipas tyre, veprimet e Shehajt mund të përbëjnë elementë të disa veprave penale, që lidhen me përvetësimin e dokumenteve, marrjen e informacionit të klasifikuar në mënyrë të paligjshme, pengimin e ushtrimit të detyrës dhe shkeljen e rregullave për mbrojtjen e sekretit shtetëror.

Nga ana e tij, Agron Shehaj i ka hedhur poshtë akuzat. Ai ka deklaruar se veprimet e ndërmarra kishin si qëllim denoncimin e mungesës së transparencës dhe mënyrën e përshpejtuar të miratimit të marrëveshjes, të cilën e konsideron në kundërshtim me parimet kushtetuese.