Vrasja në Lezhë, zbulohet edhe makina e dytë e autorëve

Zbardhen detaje të reja nga atentati i rëndë i ndodhur në Balldren të Lezhës, ku mbetën të vrarë bashkëshortët Kreshnik dhe Gentjana Mujeci. Hetimet kanë çuar në zbulimin e një tjetër automjeti që dyshohet se është përdorur nga autorët.

Sipas burimeve zyrtare, në zonën e fshatit Torovicë është gjetur një mjet tip Audi A4, i braktisur në një rrugë dytësore, në një tokë arë pranë një kanali. Dyshohet se ky automjet ka qenë pjesë e skemës së atentatit, konkretisht i përdorur nga persona që kanë vëzhguar lëvizjet e viktimave.

Po në të njëjtën zonë, një ditë më parë, u zbulua edhe një tjetër mjet i përfshirë në ngjarje, një Volkswagen Polo, çka përforcon pistën e një organizimi të mirëstrukturuar të atentatit.

Gjatë kontrollit të kryer në automjetin Audi A4, policia ka gjetur dokumente që dyshohet se u përkasin personave të shpallur në kërkim, duke shtuar elementë të rinj në hetim.

Automjeti është sekuestruar si provë materiale dhe do t’i nënshtrohet analizave të thelluara kriminalistike, me qëllim sigurimin e provave që mund të çojnë në identifikimin dhe kapjen e autorëve.

Ndërkohë, strukturat e Policisë së Lezhës vijojnë kontrollet intensive në terren për lokalizimin e personave të dyshuar dhe dokumentimin e plotë të ngjarjes së ndodhur më 26 prill 2026 në fshatin Balldren.