Irani dhe Izraeli shkëmbyen sulme të reja herët më 21 qershor, duke aktivizuar sirenat e sulmeve ajrore në pjesë të Izraelit qendror, përfshirë Tel Avivin, pasi Teherani tha se nuk do të negociojë për programin e tij bërthamor derisa Izraeli të ndalojë sulmet e tij.
Një breshëri raketash nga Irani filloi rreth orës 2:30 të mëngjesit, duke aktivizuar sistemet e mbrojtjes ajrore të Izraelit, të cilat kapën raketa në qiellin mbi Tel Aviv.
Shërbimi i emergjencës publikoi imazhe që tregojnë një zjarr në çatinë e një ndërtese banimi shumëkatëshe në Izraelin qendror. Mediat lokale raportuan se zjarri u shkaktua nga mbeturinat e një rakete të kapur.
Ushtria izraelite tha se forcat e saj nisën një valë të re sulmesh kundër vendeve të magazinimit dhe infrastrukturës së lëshimit të raketave në Iran.
Izraeli tha se goditi dhjetëra objektiva ushtarake, duke përfshirë vendet e prodhimit të raketave, një organ kërkimor që tha se ishte i përfshirë në zhvillimin e armëve bërthamore në Teheran dhe objekte ushtarake në Iranin perëndimor dhe qendror.
Forcat Ajrore izraelite njoftuan se kanë vrarë Amin For Judaki, komandant i njësisë së dytë të dronëve të Gardës Revolucionare. Forcat Ajrore Izraelite shpjegojnë se në rolin e tij, Amin For Judaki “filloi qindra lëshime të mjeteve ajrore pa pilot drejt territorit të Shtetit të Izraelit, nga zona e Ahvazit në Iranin jugperëndimor”.
Sulmet ndodhën pasi Ministri i Jashtëm iranian, Abbas Araqchi, mori pjesë në disa orë bisedime me ministrat e jashtëm evropianë në Gjenevë, të cilat dhanë vetëm një deklaratë që shprehte “shqetësime të mëdha” në lidhje me përshkallëzimin e tensioneve dhe një gatishmëri për t’u takuar përsëri.
