Si shkoi SPAK në ‘gjurmët’ e saj?

Hetimi i SPAK për fraksionin e dosjes AKSHI është zgjeruar te drejtuesja e SHISH-it. Hyseni dyshohet për përkrahje të autorit të krimit dhe zbulim të të dhënave sekrete.

Hetimi i Prokurorisë së Posaçme ndaj biznesmenit Ergys Agasi ka marrë një zhvillim të ri, duke prekur edhe drejtuesen e Shërbimit Informativ të Shtetit, Vlora Hyseni.

Gjykata e Posaçme kundër Korrupsionit dhe Krimit të Organizuar ka caktuar ndaj Hysenit masën e sigurisë “arrest në shtëpi”, si dhe ka vendosur pezullimin e saj nga detyra. Sipas të dhënave të bëra publike, ajo dyshohet për veprat penale “përkrahja e autorit të krimit” dhe “zbulimi i akteve ose të dhënave sekrete”.

Nuk është ende e qartë nëse masa e sigurisë është ekzekutuar, ndërsa operacioni i SPAK dhe BKH vijon.

Si mbërriti hetimi deri te drejtuesja e SHISH-it?

Zgjerimi i hetimit lidhet me provat e administruara gjatë kontrolleve në zyrën e Ergys Agasit. Sipas raportimeve, pamjet filmike të sekuestruara aty, së bashku me materiale të tjera të mbledhura nga hetuesit, kanë shërbyer për hapjen e një fraksioni të ri të dosjes AKSHI.

Në pamjet e sekuestruara raportohet se dokumentohen takime të Agasit me ministra dhe zyrtarë të tjerë të lartë. Vetë biznesmeni ka pranuar zhvillimin e këtyre takimeve, por ka kundërshtuar që ato të përbëjnë veprimtari kriminale.

Hetuesit po analizojnë materialet e sekuestruara për të përcaktuar marrëdhëniet dhe komunikimet mes personave të përfshirë në hetim, si dhe nëse informacionet e administruara nga funksionarë shtetërorë janë përdorur apo përcjellë në kundërshtim me ligjin.

Kontrolle në banesën e Ilir Prodës

Në të njëjtën kohë, SPAK ka zhvilluar kontrolle në banesën e Ilir Prodës, ish-drejtorit të Përgjithshëm të Policisë së Shtetit. Kontrollet janë shtrirë edhe në banesa të zyrtarëve të tjerë të strukturave të Policisë.

Operacioni i së martës lidhet me hetimet e zgjeruara që kanë dalë nga dosja e AKSHI-t pas arrestimit të Ergys Agasit. Ky i fundit ndodhet në paraburgim dhe ndaj tij SPAK ka ngritur akuza për disa vepra penale në kuadër të hetimit për tenderët e AKSHI-t.

Rasti i Vlora Hysenit e bën veçanërisht të ndjeshëm këtë fraksion të hetimit, pasi dyshimet e ngritura lidhen me informacionin sekret dhe funksionimin e një prej institucioneve kryesore të sigurisë në vend.

Hetimet janë në vijim dhe përgjegjësia penale e çdo personi të përfshirë do të përcaktohet nga gjykata, në përputhje me procesin gjyqësor.